LSDM: Në vend të çmimeve Mickoski ka ngrirë pagat, VMRO-DPMNE: Filipçe posedon biznes në Bullgari!

LSDM-ja ka akuzuar se politikat ekonomike të Qeverisë po e çojnë vendin drejt varfërisë. Sipas opozitës maqedonase çmimet e produkteve bazë vazhdojnë të rriten në mënyrë të pakontrolluar, ndërsa Qeveria nuk ka kurrfarë kontrolli. Zëdhënësja e LSDM-së i bëri thirrje Qeverisë që të heqë dorë nga politikat e gabuara dhe urgjentisht të marra masa.

“Qytetarët ankohen për jetesën gjithnjë e më të shtrenjtë, ndërsa Mickoski vetëm apelon biznesmenët që t’i ulin çmimet. Kur ishin në opozitë, ishin të zëshëm dhe kritikonin masat e LSDM-së, me të cilat mbrojtëm standardin e qytetarëve, ulëm çmimet dhe luftonin çdo ditë me inflacionin. Sot në kolltukët komode të Qeverisë, nuk iu bëhet vonë dhe e harruan popullin në tërësi. Derisa shporta e konsumit rritet, pushteti i Mickoski shkurton paratë me rishikimin e buxhetit dhe nuk parashikon fonde për pagë më të lartë minimale. Nuk jep para as për pagat në arsim, por edhe në sektorë të tjerë. Punëtorët janë margjinalizuar dhe harruar, të ballafaquar me çmime të larta dhe paga të ngrira. Në vend se të ngrijë çmimet, Mickoski ka ngrirë pagat”, deklaroi Bogdanka Kuzeska, LSDM. 

Lideri aktual i LSDM-së, Venko Filipçe, ende nuk e ka regjistruar kompaninë e tij që e ka në Petrich të Bullgarisë në fletën anketuese, edhe pse ka marrë obligim për këtë nga Komisioni Shtetëror për Parandalimin e Korrupsionit, ka akuzuar Maria Miteva nga VMRO-DPMNE në një konferencë për shtyp. Ajo bëri të ditur se VMRO-DPMNE në ditët në vijim do të japë detaje se çfarë fshihet në adresën në Petriç.

“Në ditët në vijim do t’i prezantojmë opinionit publik për lidhjen afariste të Zaevit dhe Filipçes, do të ndriçojmë nëse Venko Filipçe është kryetar i LSDM-së në mënyrë që më lehtë të menaxhojë rrjetin e kompanive nga Bullgaria, nga Petriçi dhe Strumica deri në Shkup, sikurse familjet e Zaevit dhe Filipçes hynë në biznese miliona dollarëshe sa ishin në detyrë dhe si u lidhën me kompani me aktivitete të dyshimta. Vërejmë se të gjitha këto gjetje tashmë janë bërë publike nga IRL, por Venko Filipçe dhe LSDM iu shmangën çdo përgjigje”, tha Miteva.