Eurointegrimet, opozita kërkon qëndrim të qartë nga Qeveria

Qeveria ka qëndrime të kundërta për proceset eurointegruese të Maqedonisë dhe kjo është arsye edhe më e madhe për një seancë parlamentare në të cilën kryeministri Mickoski duhet të deklarojë planet e Qeverisë për përparimin e vendit, vlerëson kryetari i LSDM-së, Venko FIlipçe.

Ai thotë se nëse Mickoski nuk e bën këtë, atëherë LSDM-ja do të përdorë të gjitha mekanizmat për ta mbajtur atë seancë përmes një kërkese formale drejtuar Kuvendit.

“Më vjen keq që ministri i tij Murtezani i demanton paralajmërimet dhe deklarimet e tij se gjoja ka një mbështetje për të kaluar ndryshimet kushtetuese me veprim të prolonguar. Vetë ministri tha se në asnjë vend të BE-së nuk ka disponim për një gjë të tillë. Besoj se ato deklarata konfuze, ato tone disonante në Qeveri që të lënë përshtypjen se ka mungesë të plotë të perspektivës, duhet të zbardhen në Kuvend. Duhet të dimë se cili është plani i Qeverisë, nëse ka dhe si do të vazhdojmë rrugën e integrimit evropian.”, – deklaroi kryetari i LSDM-së, Venko Filipçe.

Edhe BDI-ja opozitare me qëndrim se Qeveria duhet të ketë një qëndrim të qartë sa i përket eurointegrimeve. Integristët vlerësojnë se Qeveria ka qasje destruktive në aspekt të eurointegrimeve.

“Qeveria vetëm po mundohet ta defokusojë opinionin, për shkak se nëse ne ngecim prapa, ata janë kampion në drejtim të qasjes destruktive, por edhe propagandës kundër procesit eurointegrues.”, – theksoi Arbana Pasholli nga BDI.

Nga Qeveria u përgjigjën se qëndrojnë të përkushtuar në procesin eurointegrues. Zëdhënësja e Qeverisë, Miteva tha se sapo të përgatitet pakoja evropiane, do të caktohet seanca në Kuvend ku do të njoftohen deputetët, por edhe opinioni.

“Nga ajo që e kemi prezantuar në opinion si nga ministri për Çështje Evropiane, por edhe nga kryeministri, gjithsesi se kur do të përgatitet një vendim i tillë, sigurisht që fillimisht do të njoftohet opinioni. Nuk bëhet fjalë për diçka që do të mbetet sekret. Gatishmëria e Qeverisë në aspekt të rrugës eurointegruese gjithmonë është e hapur para qytetarëve, me qëndrime qartë të deklaruara, ashtu që pajtohem se për të njëjtën kur të krijohen kushtet do të njoftohet opinioni.”, – u shpreh zëdhënësja e Qeverisë, Marija Miteva.

Përndryshe, procesi eurointegrues i vendit për momentin ka ngelur i bllokuar, për shkak se deri më tani nuk ka pasur disponim për miratimin e ndryshimeve kushtetuese, që është kusht për zhvillimin e mëtejshëm të bisedimeve. (TVM2)