Dita Botërore e Ushqimit, qytetarët: Ushqimi në RMV është jocilësor

Ushqyerja e shëndetshme dhe aktivitetet e rregullta fizike janë bazë për një shëndet të mirë dhe për parandalimin e shumë sëmundjeve, si dhe për trajtimin e disa të tjerave. Me rastin e Ditës Botërore të Ushqimit, dietologët rekomandojnë qytetarët që të jenë më të vëmendshëm gjatë blerjes së produkteve ushqimore.

Dietologia Valbona Kadriu thotë se për shëndet të mirë është e rëndësishme të konsumohen frutat dhe perimet sezonale.

“Mjafton ndonjëherë t’i marrin ushqimet që i kemi para vetes, natyra që i servon ato ushqime. Kjo nënkupton që kemi fruta, perime që janë aktuale sezonale dhe jo rastësisht e ka bërë të veten p.sh. tani në vjeshtë i kemi kungullin, specat e kuq, kungulleshat rrushin, mollët, dardhat d.m.th. i përmbajnë ato përbërës që organizmi ynë ka nevojë, ndërsa në pranverë dhe në verë kemi më shumë fruta të kuqe, që kanë më shumë sasi të antioksidantëve që ndihmojnë kundër rrezeve të diellit, pastaj nga dimri i kemi portokajtë, mandarinat, citruset në përgjithësi, që kanë më shumë vitamin c, që i duhen organizmit për ta mbrojtur imunitetin.”, – deklaroi dietologia, Valbona Kadriu.

Me rastin e Ditës Botërore të Ushqimit, TVM2 anketoi qytetarët për të pyetur se a u ka ndodhur të blejnë ushqim me afat të skaduar dhe për cilësinë e ushqimit në vendin tonë.

“Mundet të ndodhë, por mua nuk më ka ndodhur. Duhet të kemi parasysh që janë gjëra që nuk duhet të përdoren. Besoj që duhet të konsumohet çdoherë ushqimi i pastër.”, – tha një qytetar.

“Po, më ka ndodhur të blej me afat të skaduar çokollatë, por e kam kthyer përsëri në market. Ndërsa, sa i përket mjaltit, unë blej prej njërit që ruan bleta dhe assesi në nuk blej në tregje, se nuk e di sa është cilësor.”, – tha një qytat tjetër.

“Jo, rrallëherë më ka ndodhur.”, – u shpreh një qytetar.

“Jo, mua nuk më ka ndodhur asnjëherë. Ka diçka të sigurt e diçka jo. Ka gjëra që u skadon afati, por kur se kupton i merr prapë, kam blerë, e ktheva, se pranuan. Po, i kontrolloj.”, – u shpreh një qytetar tjetër.

Në Agjencinë për Ushqim dhe Veterinari këtë vit janë dorëzuar 79 nisma nga qytetarët për mbikëqyrje inspektuese, prej të cilave 32 kanë të bëjnë me sigurinë ushqimore.

Qytetarët janë ankuar për blerje ushqimesh të skaduara, ushqime të përgatitura dhe të servirura në kushte johigjienike, të etiketuar dhe të paetiketuara në mënyrë të papërshtatshme, dyshime për helmim, si dhe ankesa të tjera lidhur me cilësinë e produkteve ushqimore.