Edhe Maksim Dimitrievski me kompani në Bullgari

Lideri i Znam, Maksim Dimitrievski, në emisionin “Vetëm Intervistë” në Kanal 5 ka konfirmuar se zotëron 20 për qind të aksioneve dhe se është themelues i kompanisë bullgare MBS Global, por që nuk ka të ardhura, përcjell FLAKA.

“Pra, në botën e politikës vij nga biznesi privat, kështu ushqeva dhe mbaja familjen. Unë funksionoj me një familje në të cilën askush nuk jetonte në rubinetin e shtetit. Ajo kompani nuk u ngrit kurrë. Ne donim të rieksportonim nga Lindja e Mesme dhe SHBA. Në atë moment, Bullgaria ishte një vend anëtar i BE-së dhe nga atje biznesi mund të funksiononte më lehtë, por kjo ide nuk u realizua kurrë. Tani nuk kam kohë për biznes, tani jam politikan”, tha Dimitrievski.

Paraprakisht ishte bërë e ditur se kryetari i Komunës së Kumanovës është pronar i kompanisë MBS GLOBAL, e cila është regjistruar më 07.08.2015 me adresë në bulevardin “Stefan Karaxha” në Burgas dhe sipas përshkrimit kompania merret me tregti me shumicë, por jo produkte ushqimore.

Për takimin me ambasadorin rus Sergej Bazdnikin, ai tha se e ka pritur si kryetar të Kumanovës, e jo si partner koalicioni në mazhorancën qeverisëse.

“Çdo javë kam takime me ambasadorë. Ka një organizatë joqeveritare që organizon çdo vit panair ushqimor dhe këtë vit ka pasur një promovim të kuzhinës ruse. Sa i përket mësimit të gjuhës ruse në Kumanovë, në ato dy shkolla mësohet për 70 vjet dhe janë të interesuar vetëm pak më shumë se 50 fëmijë”, tha ai.

Për marrëdhëniet me Bullgarinë dhe për integrimet e bllokuara evropiane, Dimitrievski tha se për këtë më së shumti fajin e ka qeveria e kaluar, sepse e shndërroi problemin nga niveli bilateral në multilateral në Bruksel.

“Protokolli i parë dhe i dytë, nënshkrimi i propozimit francez na çuan në situatën në të cilën ndodhemi dhe duhet të luftojmë për pozicionet tona. Tani duhet të kërkojmë konsensus dhe mbështetje nga etnitë e tjera. Kërkojmë nga shqiptarët që ta kuptojnë këtë situatë”, tha Dimitrievski.

Kryetari i ZNAM-it tha se ruajtja e origjinës etnike të maqedonasve është shumë më e rëndësishme se çdo anëtarësim në aleanca. FLAKA