Gostivari hap zemrën për botën: Fillon edicioni i pestë i Festivalit Ndërkombëtar “Rudina Fest 2025

Kryetari i Komunës së Gostivarit, Valbon Limani, hapi zyrtarisht sonte edicionin e pestë të Festivalit Folklorik Ndërkombëtar “Rudina Fest 2025”, një prej ngjarjeve më të rëndësishme kulturore që promovon trashëgiminë folklorike dhe forcon lidhjet ndërkombëtare përmes artit dhe traditës.

Festivali do të zhvillohet nga 20 deri më 23 korrik, duke sjellë në Gostivar ansamble folklorike dhe grupe artistike nga: Spanja, Kroacia, Bosnja dhe Hercegovina, Shqipëria, Kosova dhe Maqedonia e Veriut.

Edicioni i sivjetshëm nisi me programin artistik nga fshati Çegran, ndërsa netët finale do të mbahen në qendrën e qytetit të Gostivarit, më 22 dhe 23 korrik, duke e kthyer qytetin në një skenë të hapur të folklorit ndërkombëtar.

Në fjalimin e tij, kryetari Limani theksoi rëndësinë që ka ky festival për promovimin e kulturës, turizmit dhe bashkëpunimit ndërkulturor:

“Festivalet si ‘Rudina Fest’ janë mundësi të jashtëzakonshme për të njohur traditat e popujve të ndryshëm dhe për të krijuar një atmosferë harmonike dhe bashkëpunuese mes komunitetit tonë dhe të huajve. Ky event është një mundësi për të pasur një verë të paharrueshme në Gostivar, ku kultura, muzika dhe vallja janë në qendër të çdo momenti.”

Publiku pati mundësinë të shijojë performanca të pasura me ngjyra, ritme dhe energji, duke përfshirë valle tradicionale, muzikë live dhe aktivitete që shpalosin shpirtin e gjallë të folklorit. Flaka