Instagram prezanton “Instants”, funksionin e ri për foto spontane

Instagram ka prezantuar zyrtarisht “Instants”, një funksion të ri që synon të sjellë një mënyrë më spontane dhe private të komunikimit mes përdoruesve.

Funksioni i ri u mundëson përdoruesve të ndajnë fotografi të çastit me persona të përzgjedhur, ndërsa fotot zhduken pasi të jenë parë nga marrësit. Megjithatë, ato ruhen automatikisht në arkivin privat të përdoruesit deri në një vit dhe më pas mund të ripublikohen në formë përmbledhjeje në Stories.

Përdoruesit mund të reagojnë dhe t’u përgjigjen fotografive, ndërsa përgjigjet dërgohen direkt në mesazhet private (DM), duke e bërë komunikimin më interaktiv dhe personal.

Krahas këtij funksioni, Instagrami ka lansuar edhe aplikacionin shoqërues “Instants”, i cili ofron qasje më të shpejtë në kamerë dhe në ndarjen e përmbajtjes. Aktualisht, aplikacioni është i disponueshëm vetëm për disa shtete të përzgjedhura në pajisjet iOS dhe Android.

“Instants” mund të gjendet në këndin e poshtëm të djathtë të mesazheve direkte në Instagram dhe paraqitet si një grup i vogël fotografish.

Kur një përdorues ndan një foto përmes këtij funksioni, ai mund të shtojë një përshkrim, por pas publikimit nuk mund të bëhen ndryshime të tjera. Gjithashtu, përdoruesit kanë kontroll të plotë mbi personat me të cilët ndajnë përmbajtjen dhe mund ta anulojnë dërgimin nëse ndryshojnë mendim.

Në pjesën e sipërme të djathtë të “Instants” ndodhet edhe arkivi privat, i cili është i dukshëm vetëm për vetë përdoruesin.

Flaka