BDI-Tetovë me akuza për keqmenaxhim në NPK “Tetova”: Punëtorët pa paga – ku shkojnë paratë publike?

Koordinatori i grupit të këshilltarëve të BDI-së në Këshillin Komunal të Tetovës, Liridon Disha, ka dalë me akuza serioze ndaj udhëheqjes komunale dhe Ndërmarrjes Publike Komunale NPK “Tetova” – Tetovë, duke denoncuar keqmenaxhim dhe abuzim me fondet publike.

“Pavarësisht se buxheti i paraparë për NPK ‘Tetova’ është trefishuar gjatë vitit të fundit, punëtorët e kësaj ndërmarrjeje vazhdojnë të maltretohen në mënyrë të pafalshme – aktualisht me katër paga të papaguara dhe mbi një vit pa u paguar sigurim!”, deklaroi Disha.

Ai vuri në pah se, megjithëse gjatë vitit të kaluar buxheti i kësaj ndërmarrjeje ka arritur në 60 milionë denarë, punëtorët ende përballen me mospagimin e rrogave dhe mungesën e sigurimeve shëndetësore dhe pensionale.

“Nëse as buxheti prej 60 milionë denarësh nuk mjaftoi për të siguruar pagat bazë të punëtorëve, atëherë sa para do duhet të japin qytetarët e Tetovës që udhëheqësit e komunës të mjaftohen?”, pyeti Disha.

Sipas tij, ka dyshime serioze për rrjedhje fondesh dhe keqmenaxhim sistematik, ndaj bëri thirrje për hetim të menjëhershëm nga organet kompetente.

“Në xhepat e kujt përfundojnë paratë publike të NPK-së? A përfundojnë ato në duart e familjarëve, shokëve të partisë apo të të punësuarve fiktivë?”, shtroi ai pyetjen drejtuar kryetarit të komunës, Bilall Kasami.

BDI kërkon që të publikohet lista e punësimeve dhe pozitat e të punësuarve në ndërmarrje, si dhe të realizohet një auditim i pavarur financiar për të zbuluar shkeljet e mundshme.

“Kjo nuk është thjesht papërgjegjësi – është abuzim i drejtpërdrejtë me paranë publike”, theksoi Disha.

Ai përfundoi duke bërë thirrje për transparencë të plotë, hetim prokurorial dhe përgjegjësi penale për çdo keqpërdorim:

“Punëtorët e ndershëm të NPK-së nuk e meritojnë këtë trajtim poshtërues. Tetovarët nuk meritojnë të zhvaten, të mashtrohen dhe të keqpërdoren për interesa politike apo familjare. Komuna e Tetovës duhet të japë llogari – tani!” Flaka