Kompania serbe investon 50 milionë euro në Maqedoninë e Veriut

Drejtori i Përgjithshëm i Telekom Serbisë, Vladimir Luçiq, deklaroi se kompania po hyn në një fazë të re të zhvillimit në tregun e Maqedonisë së Veriut, me një investim shtesë prej 50 milionë eurosh, shkruan Flaka. Qëllimi është që Telekom Serbia të bëhet operatori kryesor i telekomunikacionit në vend, siç tashmë ka ndodhur në Mal të Zi.

“Në Maqedoninë e Veriut, tregu është jashtëzakonisht konkurrues dhe i zhvilluar. Interneti optik dhe telefonia mobile janë shumë të avancuara, ndërsa ne jemi lojtarë të rinj. Do të përpiqemi që në të ardhmen e afërt të kontribuojmë në rritjen e mëtejme të konkurrencës,” deklaroi Luçiq për Newsmax Balkans në Shkup.

“Në përgjithësi, Ballkani Perëndimor ka një nivel të lartë zhvillimi të infrastrukturës optike dhe mobile. Nëse shikohen disa studime të Kombeve të Bashkuara, shihet se niveli i zhvillimit të telekomunikacionit në rajon është shumë i avancuar,” shtoi ai.

Duke folur për investimet aktuale në Maqedoninë e Veriut, Luçiq theksoi se deri tani janë investuar 18 milionë euro si investim i drejtpërdrejtë i huaj.

“Jemi të përkushtuar në një strategji afatgjatë për prani në këtë treg, prandaj edhe investimet janë të mëdha dhe serioze.”

“Kompania jonë në Maqedoninë e Veriut aktualisht ka mbi 100.000 përdorues dhe 90 të punësuar. Kemi marrë një pjesë të United Group në Serbi dhe tani edhe në Maqedoni. Pjesa që më parë njihej si Total TV tani është integruar në rrjetin tonë,” shpjegoi drejtori i Telekom Serbisë.

“Pas katër vitesh po nisim një cikël të ri investimesh në Maqedoninë e Veriut, me plan për të investuar 50 milionë euro. Do të punojmë aktivisht në ndërtimin e rrjetit optik dhe do të shqyrtojmë mundësinë e blerjes së operatorëve më të vegjël kabllorë, me synim të vazhdojmë rritjen,” shtoi Luçiq, transmeton Flaka.

Zgjerimi i Newsmax në Evropën Lindore

Luçiq theksoi se çdo konkurrencë është e mirëseardhur dhe se Telekom tashmë disponon programe të veta të njohura sportive, kulturore, argëtuese dhe informative.

“Jam i kënaqur të jem mysafir në Newsmax Balkans, i cili së shpejti do të shndërrohet në një platformë më të madhe, pasi planifikojmë zgjerimin e Newsmax në të gjithë rajonin e Evropës Lindore. Do të sjellim cilësi të re dhe përmbajtje të pasur mediatike,” tha ai.

“Nga tetori, me kërkesë të përdoruesve, do të fillojnë transmetimin tre kanale të lokalizuara të Arena Sport në gjuhën maqedonase, me qëllim që ky numër të arrijë në pesë kanale,” paralajmëroi Luçiq.

Thirrje për startup-et dhe kompanitë e AI

Luçiq bëri thirrje për kompanitë lokale të IT-së dhe startup-et që punojnë në zgjidhje të lidhura me inteligjencën artificiale, që të aplikojnë për mbështetje financiare përmes platformës së Telekom Serbisë.

“Deri tani kemi ndihmuar 22 kompani dhe jemi shumë të interesuar të mbështesim zhvillimin e startup-eve në rajon, veçanërisht atyre që merren me zbatimin e inteligjencës artificiale,” tha ai.

Ambicie për pozitë lidere në të gjitha tregjet e Ballkanit

“Qëllimi ynë përfundimtar është që Telekom Serbia të bëhet zgjedhja e parë për përdoruesit në të gjitha tregjet e rajonit, siç kemi arritur tashmë në Mal të Zi. Edhe pse fillimi nuk ishte i lehtë, për dhjetë vjet arritëm të bëhemi operatori numër një në atë shtet,” përfundoi Vladimir Luçiq.

Me këto investime, Telekom Serbia nuk po shfaqet vetëm si një lojtar i ri në tregun e Maqedonisë së Veriut, por si një partner strategjik që do të investojë afatgjatë në infrastrukturë, inovacion dhe burime njerëzore. Ambicia është e qartë – të ndërtohet një kompani që do të jetë zgjedhja e parë për përdoruesit, nxitëse e transformimit digjital dhe shembull i një investitori të përgjegjshëm që ngre standardet në treg. Maqedonia e Veriut meriton një partner të fortë dhe të qëndrueshëm në telekomunikacion, dhe Telekom Serbia është e gatshme ta marrë këtë rol. Flaka