Bujar Osmani prezanton programin gjithëpërfshirës për zhvillimin e sportit në Çair

Kandidati për kryetar të Komunës së Çairit, Bujar Osmani, prezantoi dje para sportistëve dhe punëtorëve të sportit një program gjithëpërfshirës për zhvillimin e sportit, i bazuar në analiza të detajuara dhe rekomandime nga ekspertë vendorë dhe ndërkombëtarë.

Programi synon të adresojë mangësitë në sportin në Çair, përfshirë mungesën e strategjisë zhvillimore, sallat dhe fushat jofunksionale, qasjen e kufizuar për gratë, të rinjtë dhe personat me aftësi të kufizuara, si dhe mungesën e aktiviteteve dhe garave për të rinjtë.

“Kjo nuk është vetëm një listë projektesh, por një strategji me një vizion të qartë – Çairi të bëhet shembull i një mjedisi sportiv modern, të qasshëm dhe gjithëpërfshirës, ku çdo fëmijë dhe çdo qytetar ka mundësi për një jetë aktive dhe të shëndetshme,” – theksoi Osmani.

Programi parashikon:

• Rinovimin e plotë të sallave ekzistuese sportive, si “Enver Idrizi”, “Vasil Glavinov”, “Imri Elezi” dhe “Liria”.
• Legalizimin dhe rikonstruksionin e sallave “Shaban Tërstena” dhe “Partizani”, ku kjo e fundit do të shndërrohet në qendër moderne sportive multifunksionale që do të mbajë emrin e kampionit olimpik Shaban Sejdiu.
• Ndërtimin e një salle të re sportive që do të mbajë emrin e boksierit Aziz Saliu.
• Krijimin e fushave të hapura sportive dhe rregullimin e parqeve dhe oborreve të shkollave me përmbajtje sportive-rekreative.
• Sigurimin e programeve dhe infrastrukturës së qasshme për personat me aftësi të kufizuara, gratë dhe të moshuarit.
• Mbështetje financiare dhe bursa për sportistët e rinj të talentuar, si dhe mundësi për klubet sportive të aplikojnë për mjete komunale dhe fonde evropiane.
• Themeltimin e klubeve të reja gjimnastike, atletike dhe xhudo, si dhe specializimin e shkollave sipas sporteve.

Programi përfshin gjithashtu aktivitete për edukatë fizike, Java e Sportit, liga sportive shkollore, turne dhe olimpiada komunale, si dhe krijimin e një Qendre për kërkime në sport, që integron shkencën, edukatën fizike dhe shëndetin.

“Prioritet në dy vitet e para do të jetë revitalizimi i plotë i objekteve ekzistuese sportive, nga çatitë dhe ndriçimi, deri te zhveshtoret dhe hapësirat sanitare,” – paralajmëroi Osmani.

Ai gjithashtu nënvizoi rëndësinë e trajnimeve dhe asistencës teknike për klubet sportive në aplikimet për fonde evropiane dhe partneritete ndërkombëtare.

Ky program synon që Çairi të bëhet shembull i një mjedisi sportiv modern, gjithëpërfshirës dhe të qasshëm për të gjithë qytetarët. Flaka Media