Bujar Osmani prezantoi „Syri Qytetar“ – katër mekanizma kundër korrupsionit në Çair

„Çairi sot është një nga komunat më jotransparente në Maqedoni. Korrupsioni dhe nepotizmi e ngulfatin zhvillimin, ndërsa komuna është e uzurpuar nga ata që e udhëheqin. Në vend që t’u shërbejnë qytetarëve, ata punojnë për interesat e tyre,“ – deklaroi kandidati për kryetar të Komunës së Çairit, Bujar Osmani, gjatë prezantimit të platformës së tij për transparencë.

Ai tha se pas 19 tetorit kjo gjendje do të marrë fund.
„Nga më jotransparentja, Komuna e Çairit do të jetë në pesë komunat e para për transparencë,“ – porositi Osmani.

Duke e theksuar se „fjalët boshe ua lë kundërshtarëve“, Osmani tha se vetë do të dëshmojë me vepra. Për këtë qëllim ai prezantoi setin e ri të mekanizmave për luftë kundër korrupsionit dhe mbrojtje të interesit publik nën emrin „Syri Qytetar“.

„Ky set përfshin katër zgjidhje të reja që deri më tani nuk i ka futur asnjë komunë. Nuk mjafton vetëm të kesh dëshirë, por nevojiten edhe mekanizma të qartë,“ – tha Osmani.

Katër mekanizmat që përbëjnë „Syrin Qytetar“ janë:

• Hapja publike e tenderëve – çdo hapje e ofertave për prokurime publike do të jetë publike, me transmetim direkt dhe me incizim të qasshëm në internet.
• Monitorim i pavarur – OJQ dhe ekspertë të antikorrupsionit do të përfshihen në procesin e përzgjedhjes së ofertuesve në tenderët më të mëdhenj.
• “Arka publike” – qytetarët do të mund të ndjekin online të hyrat dhe shpenzimet e komunës.
• “Kontrolli AI” – futja graduale e inteligjencës artificiale për kontroll të procedurave dhe alarmim në rast shkeljesh ligjore.

„Me këto mekanizma konkrete dhe efikasë do të sigurojmë transparencë të vërtetë dhe do ta mbrojmë komunën nga korrupsioni. Kjo është angazhimi im ndaj qytetarëve të Çairit,“ – përfundoi Osmani.