Nga izolimi te miqësia e diskutueshme – Kosova në kurs përplasjeje

Flaka Editorial

Në skenën politike ballkanike, Kosova po përjeton një periudhë të pazakontë dhe të rrezikshme izolimi diplomatik. Aty ku pritej të kishte partneritet strategjik, sot duket se mbizotëron bllokada. Marrëdhëniet me Bashkimin Europian, Shtetet e Bashkuara të Amerikës dhe Shqipërinë – shtyllat që historikisht kanë garantuar mbështetje të pakushtëzuar për Prishtinën – janë në krizë të hapur.

Nga embargo me aleatët…

Qeveria e Albin Kurtit është përballur me embargo të shumëfishta, që nga sanksionet e BE-së e deri te paralajmërimet e drejtpërdrejta të Uashingtonit. Tirana zyrtare ka ndjekur të njëjtën linjë, duke e bërë të qartë se politikat e njëanshme dhe të mbyllura të Kurtit e kanë dobësuar pozitën ndërkombëtare të Kosovës. Kjo gjendje, për herë të parë që nga shpallja e pavarësisë, e lë vendin pa krahët tradicionalë të sigurisë dhe zhvillimit.

…te afërsia me qeverinë antishqiptare

Në këtë vakuum diplomatik, po shfaqet një paradoks: Prishtina po afrohet me Shkupin, ku qeveria e VLEN-it vazhdon të mbajë qëndrime të diskutueshme e shpesh antishqiptare brenda vetë Maqedonisë së Veriut. Ky orientim është i pakuptueshëm, sidomos kur dihet se Shkupi nuk ka qenë asnjëherë një mbështetës i palëkundur i çështjes kosovare, përkundrazi ka përdorur Kosovën shpesh si kartë për pazare të brendshme politike.

Kurti në kurs përplasjeje

Me një retorikë sfiduese ndaj Brukselit, me kundërvënie të hapur ndaj Uashingtonit dhe me distancim të dukshëm nga Tirana, Albin Kurti e ka futur Kosovën në një kurs përplasjeje që mund të ketë pasoja të parikuperueshme. Nga një lider që dikur shihej si simbol i rezistencës dhe shpresës, sot ai po perceptohet si faktor i izolimit.

Izolim nga Perëndimi – lidhje me Shkupin

Kosova ka mbetur e bllokuar në dyert e Perëndimit dhe po tenton të gjejë aleatë aty ku realisht ka më shumë pengesa sesa ndihmë. Miqësia e sforcuar me Shkupin nuk mund të zëvendësojë partneritetin me Washingtonin dhe Brukselin, ndërsa distancimi nga Tirana vetëm sa e copëzon zërin shqiptar në rajon.

Në këtë rrethanë, është e qartë se Kosova rrezikon të humbasë më shumë sesa fiton. Diplomacia e bazuar në kokëfortësi nuk mund të zëvendësojë realpolitiken. Pa miqtë e vërtetë – SHBA-në, BE-në dhe Shqipërinë – çdo aleancë tjetër është thjesht një iluzion i përkohshëm.