Kurti shpall “fitoren historike”
Botuar nga Flaka
Kryetari i Lëvizjes Vetëvendosje dhe kandidati për kryeministër, Albin Kurti, ka shpallur fitoren e partisë së tij pas publikimit të rezultateve preliminare nga zgjedhjet e 28 dhjetorit.
Pas procesimit të mbi 96 për qind të vendvotimeve, Lëvizja Vetëvendosje me partnerët ka siguruar gati 50 për qind të votave, duke konfirmuar epërsinë bindëse ndaj subjekteve të tjera politike.
Në fjalimin e tij, Kurti shprehu mirënjohje të thellë për qytetarët, aktivistët dhe strukturat e partisë:
“Më lejoni të shpreh mirënjohjen time të thellë dhe falënderimin e jashtëzakonshëm gjithandej vendit tonë. Një falënderim për mijëra vullnetarë, simpatizantë e aktivistë që organizuan fushatën dhe ishin krahu ynë i fortë në këtë fitore madhështore.”
Ai theksoi se këto zgjedhje përfaqësojnë një fitore të popullit dhe të shtetit:
“Me 9 shkurt sivjet fitoi LVV me partnerët, me 28 dhjetor 2025 fitoi populli i Kosovës dhe Republika. Urime fitorja më e madhe në historinë e vendit.”
Kurti shtoi se rezultati zgjedhor është një mesazh i qartë për vazhdimin e punës pa vonesa, duke theksuar rëndësinë e formimit të shpejtë të institucioneve pas certifikimit të rezultateve.
“Sa më parë që të certifikohen rezultatet, aq më shpejt do të na duhet t’i krijojmë institucionet dhe të vazhdojmë me punë të mirë dhe projektet e nevojshme.”
Ai përmendi gjithashtu se në legjislaturën e 10-të të Kuvendit të Kosovës e pret qeverinë e re Plani i Rritjes së Bashkimit Evropian, në vlerë prej 880 milionë eurosh, duke e cilësuar atë si një mundësi të rëndësishme për zhvillimin ekonomik të vendit.
Botuar nga Flaka
