Aleanca për Shqiptarët: VLEN zgjodhi pushtetin, jo interesin e shqiptarëve

Aleanca për Shqiptarët ka akuzuar koalicionin VLEN se, dy vjet pas hyrjes në qeveri me premtimin për ndryshim, nuk ka realizuar zotimet kryesore ndaj qytetarëve shqiptarë.

Sipas reagimit të partisë, shqiptarët nuk kanë parë ndryshimin e premtuar, por “heshtje, arsyetime dhe dorëzim”.

“Nuk ka ndryshime kushtetuese, nuk ka hap përpara në rrugën evropiane, nuk ka forcim të gjuhës shqipe, nuk ka mbrojtje reale të përfaqësimit të drejtë dhe nuk ka investime serioze në komunat shqiptare”, thuhet në reagim.

Aleanca për Shqiptarët vlerëson se VLEN premtoi se do të ishte zëri i shqiptarëve në qeveri, por sipas saj, “u bë hije e vendimeve të të tjerëve”.

Partia thekson se qytetarët shqiptarë nuk votuan për përfaqësues që “numërojnë ditët në karrige dhe heshtin kur preken interesat e qytetarëve”, duke shtuar se VLEN “nuk u rrëzua nga pamundësia, por nga zgjedhja për të qëndruar në pushtet me çdo kusht”.

Në reagim, Aleanca për Shqiptarët rikujton vendimin e saj për t’u larguar nga qeveria, duke theksuar se “kur nuk ka realizim, nuk ka arsye të qëndrohet për dekor”.

“Koha e arsyetimeve ka mbaruar. Tani çdo premtim duhet të matet me punë dhe çdo mandat me përgjegjësi para qytetarëve”, përfundon reagimi i Aleancës për Shqiptarët. Gazeta Flaka