Arben Taravari: “Gjuha shqipe nuk mbytet dot” – thirrje e fortë në mbështetje të studentëve

Kryetari i Aleancës për Shqiptarët, Arben Taravari, ka dalë me një reagim të fortë në mbështetje të protestës së studentëve shqiptarë në Maqedoninë e Veriut, duke e cilësuar çështjen e provimit të jurisprudencës në gjuhën shqipe si një betejë për dinjitetin dhe identitetin kombëtar.

Në reagimin e tij publik, Taravari tha se përpjekjet për të kufizuar përdorimin e gjuhës shqipe në procesin akademik dhe profesional po rrisin revoltën qytetare.

“Përpjekjet tuaja për të na gjymtuar intelektualisht, duke na detyruar të mbrojmë dijen në një gjuhë që nuk është jona, vetëm sa po e ndezin më shumë zjarrin e revoltës”, deklaroi Arben Taravari.

Ai theksoi se protesta e 18 majit në Shkup nuk është vetëm akademike, por një reagim ndaj, siç e cilësoi, një absurditeti ligjor dhe kulturor.

“Më 18 maj do ta kuptoni se gjuha shqipe nuk mbytet dot dhe se ky brez nuk ka ndërmend të ulë kokën para askujt”, u shpreh ai.

Sipas tij, studentët po përballen me një sistem që i privon nga e drejta për të dhënë provime në gjuhën amtare, duke e konsideruar këtë si një formë diskriminimi institucional.

Ai u bëri thirrje qytetarëve, prindërve dhe intelektualëve që të mbështesin studentët dhe të mos qëndrojnë indiferentë.

“Prandaj, kjo nuk është më thjesht një betejë e studentëve… kjo është një thirrje zgjimi për çdo shqiptar”, theksoi Arben Taravari.

Në fund të reagimit, ai paralajmëroi se çdo tentativë për të kufizuar gjuhën shqipe vetëm sa do ta forcojë rezistencën qytetare. Gazeta Flaka