Arber Ademi i përgjigjet Adnan Azizit: “Servilizmi politik solli poshtërim dhe heshtje kur duhej zë”

Debati politik mes BDI-së dhe VLEN-it është ashpërsuar sërish, pas deklaratave të ndërsjella të përfaqësuesve të dy kampeve lidhur me qeverisjen e kaluar dhe gjendjen aktuale në Tetovë dhe rajonin e Pollogut.

Deputeti i VLEN-it Adnan Azizi iu përgjigj ashpër BDI-së, duke thënë se qytetarët e Tetovës përballen ende me pasojat e qeverisjes së gjatë të kësaj partie.

Sipas tij, pas 22 viteve në pushtet, janë trashëguar probleme të shumta infrastrukturore dhe sociale.

Azizi përmendi rrugë të amortizuara, shërbime të dobëta komunale, ndotje të ajrit, deponi të egra, probleme me ujësjellësin, si dhe, siç tha ai, “politizim të arsimit dhe korrupsion”.

Ai theksoi gjithashtu emigrimin e të rinjve si një nga pasojat më të rënda.

“Kolonat e autobusëve me të rinj që largohen janë dëshmi e dështimit të qeverisjes së deritanishme,” deklaroi Azizi.

Nga BDI, Arber Ademi theksoi se shqiptarët, sipas tij, nuk do të harrojnë periudhën kur ishin “të përfaqësuar me dinjitet” në institucionet shtetërore.

“Shqiptarët nuk do të harrojnë vetëm një gjë: se për 22 vite ishin zot në tokën e tyre, të përfaqësuar me dinjitet, duke fituar të drejta, pozita dhe respekt institucional, jo duke dëgjuar arsyetime,” u shpreh Ademi.

Ai shtoi se, sipas tij, ajo periudhë përfaqëson “dinjitet politik”, ndërsa kritikoi kundërshtarët për “heshtje kur duhej zë dhe nënshtrim kur duhej qëndrim”.

Në deklaratën e tij, Azizi mbrojti edhe punën e kryetarit të Komunës së Tetovës Bilall Kasami, duke thënë se akuzat e BDI-së ndaj tij janë përpjekje për të shmangur përgjegjësinë e së kaluarës.

Ai përmendi përmirësime në pastërti, lirimin e hapësirave publike dhe investime infrastrukturore gjatë mandatit aktual. Deklaratat e dy palëve tregojnë vazhdimin e përplasjes politike mes BDI-së dhe VLEN-it, ku secila palë e interpreton ndryshe periudhën e qeverisjes së kaluar dhe gjendjen aktuale në komunat me shumicë shqiptare, veçanërisht në Tetovë.

BDI e paraqet periudhën e saj si kohë të avancimit institucional të shqiptarëve, ndërsa VLEN e konsideron atë si periudhë me probleme të thella të trashëguara që ende ndikojnë në jetën e qytetarëve. Gazeta Flaka