Arbër Ademi publikon referatin 75-faqësh: Ishte gati shfuqizimi i Ligjit për gjuhën shqipe

Sekretari i përgjithshëm i Bashkimi Demokratik për Integrim, Arbër Ademi, sonte në emisionin Click Plus publikoi për herë të parë referatin prej 75 faqesh, i përgatitur më 11 dhjetor, për abrogimin apo shfuqizimin e Ligjit për përdorimin e gjuhëve, transmeton Gazeta Flaka

Ademi deklaroi se gjykatësja që kishte përgatitur dokumentin kishte pranuar vetëm nenin 1 të këtij ligji, i cili sipas tij përcakton se “gjuhë zyrtare në Maqedoninë e Veriut është gjuha maqedonase dhe alfabeti i saj cirilik”, duke lënë jashtë çdo dispozitë që rregullon përdorimin e gjuhës shqipe.

Sipas tij, dokumenti ishte i gatshëm për të hyrë në procedurë, por protestat e organizuara para Gjykata Kushtetuese e Maqedonisë së Veriut, ku u vendosën edhe tenda, si dhe revolta e madhe qytetare, ndikuan që procesi të ndalet.

Duke folur për ligjin për përfaqësimin e drejtë dhe adekuat, Ademi tha se drafti aktual nuk përmban kuota nacionale dhe si i tillë nuk garanton mbrojtjen e shqiptarëve në institucionet shtetërore.

Ai përmendi edhe largimin e profesorit Mersim Maksuti nga komisioni për hartimin e këtij ligji, duke thënë se ky vendim ishte marrë për të ruajtur kredibilitetin e tij profesional.

“Ky është ligji i Tanja Karakamisheva, e jo një ligj për përfaqësim të drejtë dhe adekuat”, deklaroi Ademi.

Deputeti i BDI-së theksoi gjithashtu se amendamenti 5 i Kushtetutës së Maqedonisë së Veriut e sqaron qartë se gjuha që e flasin të paktën 20 për qind e qytetarëve mund të rregullohet me ligj, duke shtuar se pikërisht mbi këtë bazë është miratuar Ligji për përdorimin e gjuhëve.

Sipas Ademit, për këtë arsye Gjykata Kushtetuese duhet të shpallë veten jokompetente për shqyrtimin e këtij ligji. Gazeta Flaka