Bavarezët e duan me çdo kusht: Nico Williams objektivi kryesor i Bayernit

Bayern Munich ka identifikuar sulmuesin anësor të Athletic Bilbaos, Nico Williams, si objektivin kryesor për këtë afat kalimtar veror. Lojtari i kombëtares së Spanjës ka tërhequr interesim të madh nga klubet e mëdha evropiane, përfshirë Arsenalin, por bavarezët duket se kanë bërë hapa më konkretë drejt sigurimit të shërbimeve të tij.

Sipas gazetarit të njohur italian, Fabrizio Romano, Bayern Munich ka zhvilluar tashmë dy takime me përfaqësuesit e Williams gjatë muajit qershor, dhe planifikohen takime të tjera në ditët në vijim për të diskutuar hollësitë e marrëveshjes.

Williams ka një klauzolë lirimi prej 58 milionë eurosh në kontratën e tij aktuale me Athletic Bilbaon, por pengesa kryesore mund të jetë paga personale që kërkon lojtari, e cila konsiderohet e lartë për standardet e disa klubeve, përfshirë Arsenalin, që nuk ka bërë lëvizje konkrete deri tani.

Përkundër interesimit në rritje për talentin 21-vjeçar, Athletic Club nuk po qëndron duarkryq. Klubi bask është duke përgatitur një ofertë të re për rinovimin e kontratës, në përpjekje për ta mbajtur Williams në “San Mamés” edhe për sezonet në vijim.

Nico Williams është pjesë e ekipit të parë të Athleticut që nga sezoni 2020/21 dhe është shndërruar në një nga figurat më të rëndësishme të skuadrës. Ai pritet të jetë gjithashtu pjesë e rëndësishme e përfaqësueses së Spanjës në Euro 2024, çka mund të ndikojë më tej në vlerën dhe interesin për të.

Flaka