BDI: Inspektorati i Gjuhëve hesht për të dytën ditë, kërkohet reagim ose dorëheqje e drejtorit

Për të dytën ditë me radhë, vazhdon heshtja e Inspektoratit për Përdorimin e Gjuhëve lidhur me, sipas reagimit, shkeljen e Ligjit për Përdorimin e Gjuhëve nga ana e kryetarit të Qytetit të Shkupit.

Në reagim thuhet se kryetari i Shkupit nuk e ka korrigjuar shkeljen e pretenduar, nuk ka dhënë sqarime apo kërkimfalje dhe ka injoruar reagimet e opinionit shqiptar, gjë që, sipas tyre, përbën “arrogancë institucionale” dhe mosrespektim të ligjit.

Po ashtu kritikohet edhe Inspektorati për Përdorimin e Gjuhëve, për të cilin thuhet se ka kompetenca ligjore për të konstatuar shkeljet, për të urdhëruar korrigjimin e tyre dhe për të ndërmarrë masa ndaj institucioneve që nuk e zbatojnë ligjin.

Në reagim kërkohet nga Inspektorati:

• hapja e menjëhershme e procedurës së inspektimit;
• konstatimi zyrtar i shkeljes;
• urdhër për korrigjimin e menjëhershëm të saj;
• masa ligjore ndaj personave përgjegjës;
• njoftim publik për veprimet e ndërmarra.

Gjithashtu, kërkohet që drejtori i Inspektoratit të japë dorëheqje nëse nuk është i gatshëm ose nuk është në gjendje të ushtrojë kompetencat e tij.

Në fund të reagimit theksohet se Qyteti i Shkupit ka qenë për vite me radhë shembull i zbatimit të dygjuhësisë dhe se çdo përpjekje për ta përjashtuar gjuhën shqipe nga hapësira publike dhe institucionale përbën, sipas tyre, një hap prapa. Reaguesit paralajmërojnë se do të vazhdojnë të ndjekin çështjen me mjete ligjore, institucionale dhe politike deri në zbatimin e plotë të ligjit. Gazeta Flaka