BDI në Kërçovë me udhëheqje të re – Ali Ahmeti: “Do ta forcojmë besimin e qytetarëve”

Nga Kërçova, Ali Ahmeti ka bërë të ditur mbajtjen e Kuvendit Zgjedhor të Degës së Bashkimit Demokratik për Integrim në këtë qytet, ku janë zgjedhur strukturat e reja drejtuese të degës.

Ahmeti tha se procesi u zhvillua në një atmosferë entuziazmi dhe përkushtimi, duke theksuar rëndësinë e organizimit të brendshëm partiak.

“Në një atmosferë të jashtëzakonshme entuziazmi dhe përkushtimi, mbajtëm Kuvendin Zgjedhor të Degës së BDI-së në Kërçovë, ku u zgjodhën strukturat e reja drejtuese të degës: Kryesia e Degës, Këshilli Mbikëqyrës, Komiteti i Veteranëve dhe sekretarët e sekretariateve,” deklaroi Ahmeti.

Ai shtoi se të zgjedhurit do të bartin përgjegjësi të madhe ndaj anëtarësisë dhe qytetarëve, duke theksuar besimin në profesionalizmin e tyre.

“Jam i bindur se përgjegjësinë e marrë sonte do ta bartin me dinjitet, profesionalizëm dhe përkushtim të plotë ndaj anëtarësisë, qytetarëve dhe kauzës sonë të përbashkët,” u shpreh ai.

Ahmeti theksoi se strukturat e reja përbëhen nga “njerëz kompetentë dhe të dëshmuar”, të cilët sipas tij do ta forcojnë edhe më tej partinë si “adresën më të besueshme të shqiptarëve në vend”.

Duke iu referuar rolit të Kërçovës, ai shtoi se qyteti ka qenë gjithmonë një vatër e rëndësishme e angazhimit politik dhe kombëtar, ndërsa shprehu optimizëm për rezultatet e ardhshme politike.

Në fund, ai uroi të zgjedhurit dhe u shpreh: “Na priftë e mbara!” Gazeta Flaka