BDI publikon dokumente: pretendon lidhje pronësore mes Visar Ganiut dhe Nedim Ramës në Lisec-Vongrad

Bashkimi Demokratik për Integrim (BDI) ka dalë me një reagim publik, duke publikuar dokumente që sipas saj vijnë nga Agjencia e Kadastrës dhe që lidhen me pronësinë e disa parcelave dhe objekteve në zonën e Lisec-Vongrad.

Sipas këtij njoftimi, partia pretendon se ekziston një lidhje pronësore mes ish-kryetarit të Komunës së Çairit, Visar Ganiu, dhe drejtorit aktual të NOMAGAS-it, Nedim Rama, i cili sipas BDI-së konsiderohet edhe si bashkëpunëtor i afërt i zëvendëskryeministrit Izet Mexhiti.

Në njoftim thuhet se në Fletën Pronësore nr. 730 në Komunën Kadastrale Lisec-Vongrad figurojnë si bartës të së drejtës Visar Ganiu dhe Nedim Rama. Të dy lidhen me parcelën 1/455 në të njëjtin lokalitet. Për parcelën në fjalë është hapur edhe Fletë për Parashënim të Ndërtimit nr. 1213, ku si pronar figuron Visar Ganiu, dhe në parcelë, sipas pretendimeve, janë evidentuar shtatë objekte me destinim “shtëpi vikendi (A4-3)”.

BDI thekson se, sipas saj, nuk bëhet fjalë për një pronë të zakonshme, por për një kompleks vikendesh të ndërlidhura me persona që kanë ushtruar ose ushtrojnë funksione publike.

Në reagimin e saj, partia ngre disa pyetje publike, përfshirë: Kur dhe si është krijuar lidhja pronësore mes Ganiut dhe Ramës? Me çfarë burimesh financiare janë ndërtuar objektet? A janë deklaruar këto prona në deklarimet e pasurisë? Dhe, a ekzistojnë marrëdhënie të tjera biznesore mes tyre?

BDI u bën thirrje institucioneve kompetente, përfshirë Komisionin Shtetëror për Parandalimin e Korrupsionit, Policinë Financiare, Drejtorinë e të Hyrave Publike dhe Prokurorinë Publike, që të verifikojnë rrethanat e pronësisë dhe ndërtimit të objekteve.

Në deklaratë theksohet se çështja, sipas BDI-së, nuk është vetëm politike, por lidhet me transparencën, origjinën e pasurisë dhe konfliktin e interesit të zyrtarëve publikë.

Nga ana tjetër, deri në këtë moment nuk ka pasur reagim publik nga të përmendurit në lidhje me pretendimet e ngritura.

Deri në këtë moment, nuk ka pasur asnjë reagim apo prononcim zyrtar nga personat e përmendur në akuzat e ngritura nga BDI, përfshirë Visar Ganiun dhe Nedim Ramën, lidhur me pretendimet për lidhje pronësore dhe ndërtimin e objekteve vikendi. Po ashtu, nuk ka pasur as kundërpërgjigje publike nga institucionet apo palët e tjera të përfshira në deklaratë. Gazeta Flaka