BDI publikon kontratë për largpërçuesin: Dyshime për ndikime politike dhe dëm milionësh

Bashkimi Demokratik për Integrim (BDI) publikoi sot një kontratë që, sipas tyre, dëshmon keqmenaxhim në projektet strategjike energjetike dhe dëm për buxhetin e shtetit.

Sipas BDI-së, bëhet fjalë për një nga marrëveshjet e nënshkruara nga drejtuesi Burim Latifi me kompaninë Elnos nga Republika Serpska, për ndërtimin e largpërçuesit që lidh Maqedoninë e Veriut me Shqipërinë.

Partia opozitare ngre disa shqetësime kryesore. Sipas tyre, kompania fituese lidhet me struktura politike në Republika Serpska, përfshirë rrethin e Milorad Dodik, duke hapur dilema për ndikime politike në projekte strategjike energjetike. Po ashtu, BDI pretendon se procesi i përzgjedhjes dhe negocimit ka qenë i paqartë dhe i mbyllur për publikun.

“Në vend që ky projekt të ishte një urë bashkëpunimi energjetik me Shqipërinë dhe një investim në të ardhmen euroatlantike të vendit, ai është shndërruar në simbol të keqmenaxhimit dhe mungesës së transparencës,” thuhet në reagimin e BDI-së.

Sipas tyre, kontrata i ka shkaktuar buxhetit të shtetit dëm prej së paku 6 milionë euro.

BDI kërkon hetim të menjëhershëm dhe të pavarur për këtë rast, publikimin e plotë të dokumenteve dhe përgjegjësi politike e ligjore për të gjithë të përfshirët në vendimmarrje.

“Qytetarët meritojnë transparencë, llogaridhënie dhe mbrojtje të parasë publike. Çdo euro e humbur nga keqmenaxhimi është një euro më pak për zhvillimin e vendit,” thekson partia. Gazeta Flaka