BDI-Tetovë: Bilall Kasami po keqpërdor puntorët e Ndërmarrjes Publike Komunale

Pushteti komunal, në krye me Bilall Kasamin, duke parë se po i numërohen ditët e fundit në udhëheqje të komunës, po shkel çdo ligj dhe çdo normë etike për të përfituar vota.

Viktimë e radhës janë punëtorët e NPK “Tetova” – Tetovë, të cilëve u jepen kontrata afatshkurtra pune në prag të zgjedhjeve.

Edhe pas shumë problemeve në ndërmarrje, mungesës së pagave për muaj të tërë dhe borxhit që sa vjen e rritet, pushteti komunal ka zgjedhur përsëri të mos e respektojë dinjitetin dhe punën e punëtorëve të NPK-së.

Si Degë e Bashkimit Demokratik për Integrim në Tetovë, ndjejmë obligim publik të reagojmë lidhur me gjendjen alarmante në këtë ndërmarrje.

Punëtorët e NPK-së meritojnë respekt dhe përkrahje, jo tallje dhe abuzim.

NPK “Tetova” ka rreth 93 punëtorë të rregullt, kryesisht nga shtresat më të varfra të qytetit, të cilët kujdesen për pastrimin dhe higjienën publike. Për ta, kjo punë është burim jetese dhe mjeti i vetëm për të siguruar të ardhura për familjet e tyre. Megjithatë, këtyre punëtorëve nuk u janë paguar në mënyrë të rregullt sigurimet shëndetësore dhe pensionale për 18 muaj rresht.

Borxhet ndaj punëtorëve të rregullt me vendim pune – janë të mëdha. Vetëm në vitin 2024, ndërmarrja ka akumuluar mbi 25 milionë denarë detyrime të papaguara për tatime dhe kontribute mbi pagat. Ky borxh lidhet drejtpërdrejt me punëtorët me vendime pune në ndërmarrje, të cilët mbahen të papaguar dhe të nëpërkëmbur.

Në të njëjtën kohë, ndërmarrja ka angazhuar rreth 60 persona me kontrata në vepër, të cilët janë aktivistë partiakë. Për këta persona, pagesat bëhen rregullisht, edhe pse afërsisht 30 prej tyre nuk paraqiten fare në punë. Pra, ndërsa punëtorët e vërtetë nuk marrin sigurimet bazë, aktivistët partiakë shpërblehen për një punë që nuk e kryejnë aspak.

Ju bëjmë thirrje të gjithë të punësuarve që të mos bien pre e mashtrimeve të panumërta të Bilall Kasamit dhe të qëndrojnë të palëkundur në kërkesat e tyre për përmirësimin e kushteve të punës.

Të nderuar qytetarë, pas largimit të Bilall Kasamit, të cilit i kanë mbetur edhe disa ditë në krye të komunës, të gjithë të punësuarit në ndërmarrje do të kenë trajtimin e merituar dhe askush nuk do të mund t’i shfrytëzojë për interesa momentale politike.