BDI: VLEN-i hyri në qeveri si humbës – “Bota serbe” u bë më e pranishme se kurrë

BDI ka akuzuar VLEN-in se, pas hyrjes në qeveri, ka braktisur premtimet e dhëna gjatë fushatës dhe është shndërruar në mbështetës të politikave të VMRO-DPMNE-së, përfshirë ato që, sipas BDI-së, favorizojnë rritjen e ndikimit të “botës serbe” në Maqedoninë e Veriut.

Në një reagim të fundit, BDI thotë se VLEN gjatë zgjedhjeve kishte premtuar se nuk do të bëhej pjesë e qeverisë nëse nuk do të fitonte, madje kishte deklaruar se do të tërhiqej nga politika. Sipas BDI-së, realiteti rezultoi krejtësisht ndryshe.

“Si humbës zgjedhor, VLEN-i hyri në qeveri dhe pothuajse në çdo premtim që u dha qytetarëve shqiptarë, veproi në drejtimin e kundërt”, thuhet në reagimin e BDI-së.

Partia opozitare pretendon se shqetësimet për rritjen e ndikimit të “botës serbe” nuk janë vetëm pjesë e diskursit politik opozitar, por janë evidentuar edhe në raportet e Parlamentit Evropian gjatë dy viteve të fundit.

BDI përmend në këtë kontekst rolin e zëvendëskryeministrit Ivan Stoilkoviq, deklaratat e tij publike, afrimin me strukturat politike të Milorad Dodikut, si dhe zhvillimet në sektorin energjetik dhe atë bankar, duke i cilësuar si pjesë të një “mozaiku” që, sipas saj, dëshmon forcimin e ndikimit serb në vend.

“Faktet flasin vetë”, deklaron BDI, duke shtuar se ndikimi i “botës serbe” është rritur paralelisht me atë që e cilëson si “gërryerje sistematike të Marrëveshjes së Ohrit”.

Sipas BDI-së, vendimet e Gjykatës Kushtetuese dhe politikat e Qeverisë po cenojnë të drejtat kolektive të shqiptarëve dhe frymën mbi të cilën, sipas saj, është ndërtuar shteti pas vitit 2001.

Në këtë proces, BDI e akuzon drejtpërdrejt VLEN-in se nuk është vetëm spektator, por “kamuflues, relativizues dhe bashkërealizues” i këtyre politikave.

BDI thotë se VLEN nuk mund t’i shmanget përgjegjësisë përmes, siç i cilëson ajo, “shpifjeve, propagandës dhe sulmeve ndaj opozitës”.

“E vërteta nuk mbulohet me zhurmë politike”, thuhet në reagimin e partisë.

Në fund, BDI deklaron se qytetarët shqiptarë do të japin verdiktin për atë që e cilëson si “mashtrim politik dhe moral” të VLEN-it.

“Kush premtoi një gjë dhe bëri të kundërtën, kush premtoi dinjitet dhe solli nënshtrim, kush premtoi mbrojtje të interesit kombëtar dhe u bë mburojë e politikave që e dëmtojnë atë – për këtë verdiktin do ta japin qytetarët”, përfundon BDI. Gazeta Flaka