BDI: VLEN përdor gjuhë të ulët në ditë përkujtimi, po hesht përballë cenimit të Marrëveshjes së Ohrit

Bashkimi Demokratik për Integrim (BDI) ka reaguar ashpër ndaj koalicionit VLEN, duke e akuzuar për “gjuhë të ulët dhe baltë” pikërisht në një ditë përkujtimi për dëshmorët.

“Në ditën kur kujtojmë ata që dhanë jetën për dinjitet dhe barazi, VLEN zgjedh gjuhën e ulët dhe baltën. Kjo flet më shumë për ta sesa për ne”, thuhet në reagimin e BDI-së.

Nga kjo parti theksojnë se Marrëveshja e Ohrit nuk është çështje mandatesh politike, por një kompromis i arritur mbi sakrificë dhe vizion për shtet të përbashkët.

“Marrëveshja e Ohrit nuk është produkt mandatesh. Është kompromis i arritur mbi gjak, mbi sakrificë dhe mbi një vizion për një shtet të përbashkët. Kjo është arsyeja pse mbrohet në çdo forum në Shkup, në Bruksel, në Washington”, deklarojnë nga BDI.

BDI i përgjigjet edhe akuzave të VLEN për “karrigaxhinj”, duke përmendur emrin e Izet Mexhitit.

“Ata flasin për ‘karrigaxhinj’. Le të flasim me standardin e tyre: Izet Mexhiti — mbi 6.500 ditë në poste, mbi 8.000 ditë brenda BDI-së. Këto vite nuk i pati problem. U bënë problem vetëm kur nuk i mjaftuan më”, thuhet në reagim.

Në fokus, sipas BDI-së, është situata aktuale dhe ajo që e cilësojnë si cenim i Marrëveshjes së Ohrit.

“Sot, kur Marrëveshja e Ohrit po gërryhet hap pas hapi, kur balancuesi anulohet, kur gjuha sfidohet në praktikë, ata zgjedhin heshtjen. Dhe pastaj dalin e flasin për ‘mbrojtje të të drejtave’”, theksojnë nga BDI.

Në fund, BDI akuzon VLEN për “dorëzim dhe kapje”, duke e lidhur këtë me sakrificën e dëshmorëve.

“Dëshmorët nuk ranë që dikush të heshtë përballë padrejtësisë. Nuk ranë që dikush të negociojë dinjitetin për një vend në tryezë. Ata ranë që ky popull të mos ketë më frikë të flasë. Dhe ne do të flasim”, përfundon reagimi i BDI-së.

Bujar Osmani paska shkuar në Bruksel për t’i “mbrojtur” të drejtat e shqiptarëve në Maqedoninë e Veriut, se sipas tij qenkan rrezikuar prej ditës kur ai nuk është më ministër. Hajde parodi, hajde! Po me çfarë legjitimiteti del Bujar Osmani të flasë në emër të shqiptarëve, kur para pak muajsh humbi mu në shtëpinë e vet, në Çair, nga njerëzit e vet?

Në 22 vite pushtet të BDI-së me LSDM-në e VMRO-në, Bujar Osmani ka kaluar 3.700 ditë në ministri, në pushtet e nëpër sallone diplomatike. Aq shumë i është ngjitur karriges, sa është gati ta mbajë peng jo vetëm BDI-në për apetitet e veta, por ta bëjë peng edhe gjithë popullin shqiptar për etjen e tij për pushtet. Pak marre more!

Një tjetër karrigaxhi i përhershëm është “evropiani” Blerim Bexheti, me mbi 15 vite nëpër poste, plot 5.500 ditë në funksione. Tre mandate kryetar i Sarajit, ministër i Drejtësisë, bashkëpunëtor i Danella Arsovskës, përmes së cilës kontrollonte disa ndërmarrje publike në Qytetin e Shkupit. E tash si deputet del e na qan hallin për BE-në dhe për të drejtat e shqiptarëve.

Me pak fjalë, po i përkulet VMRO-së vetëm për t’u kthyer në qeveri. Nuk mund të rrijë as disa muaj pa pushtet. Edhe ai, si Bujari, është martuar me karrigen e lëkurës. Për tjetër gjë nuk dinë.

VLEN u bën thirrje anëtarëve të ndershëm të BDI-së të hapin sytë. Ali Ahmeti i vitit 2001 nuk ka lidhje me Ali Ahmetin e sotëm. Gjithçka për ta është klientelizëm, tenderë e para. Vetëm këto kanë në kokë. Narrativa se të drejtat politike dhe demokratike të shqiptarëve mbrohen vetëm nëse Bujari dhe Blerimi janë ministra është nënçmim i rëndë për inteligjencën e popullit tonë.

Kjo demagogji e Ali Ahmetit dhe BDI-së nuk pi më ujë as në Maqedoni, as në Kosovë, as në Shqipëri. Jemi në vitin 2026, ndërsa ata kanë ngecur keq në vitin 2008. Ende ëndërrojnë ta kthejnë Gruevskin nga Budapesti dhe bashkë me Mijallkovin të sundojnë edhe një herë.

Nuk e kuptojnë se atë film më nuk do ta shohin. Pa reforma të vërteta, si në program ashtu edhe në njerëz, BDI është shumë më afër shpërbërjes sesa kthimit në pushtet. Gazeta Flaka