Belinda Amiti: Heshtja për emërtimin e rrugëve në Tetovë tregon dallimin mes premtimeve dhe realitetit

Këshilltarja e Aleancës për Shqiptarët në Këshillin Komunal të Tetovës, Belinda Amiti, ka reaguar lidhur me anulimin e vendimit për emërtimin e rrugëve në Tetovë, duke akuzuar partitë në pushtet për mungesë qëndrimi dhe mospërmbushje të premtimeve të dikurshme.

“Për vite me radhë dëgjuam premtime se do të vazhdohej procesi i emërtimit të rrugëve sipas vullnetit të qytetarëve. Vendimi i Këshillit Komunal të Tetovës nga viti 2007 është anuluar nga Gjykata Kushtetuese, ndërsa ata që e kishin këtë çështje në qendër të premtimeve të tyre nuk ofrojnë asnjë qëndrim të qartë para qytetarëve”, deklaroi Amiti.

Sipas saj, çështja e emërtimit të rrugëve ishte një nga temat kryesore të diskursit politik kur këto subjekte ndodheshin në opozitë, por sot mungon reagimi institucional.

“Kur ishin në opozitë, emërtimi i rrugëve ishte kauzë. Sot, kur janë në pushtet, anulimi i vendimit kalon pa asnjë reagim serioz. Kjo tregon sa të sinqerta kanë qenë premtimet e tyre”, theksoi ajo.

Amiti vlerëson se përgjegjësia politike nuk matet me deklarata opozitare, por me veprime konkrete kur ushtrohet pushteti.

“Nuk mjafton të flasësh për dinjitet, identitet dhe të drejta kur je në opozitë. Përgjegjësia matet kur ke mundësinë të veprosh. Heshtja e sotme është dëshmia më e qartë e dallimit mes premtimeve të dikurshme dhe realitetit të sotëm”, përfundoi këshilltarja e ASH-së në Tetovë. Gazeta Flaka