Berat Murati alarmon: Komuna e Tetovës po planifikon t’i privatizon parkingjet publike

Koordinatori i këshilltarëve të opozitës në Këshillin Komunal të Tetovës, Berat Murati, ka ngritur shqetësime lidhur me një propozim-vendim të ri të Komunës së Tetovës, përmes të cilit, sipas tij, parashihet që parkingjet publike të jepen në shfrytëzim dhe menaxhim përmes koncesionit ose partneritetit publik-privat.

Murati vlerëson se me këtë model, shërbimi publik dhe të ardhurat nga parkimi mund të kalojnë në duart e një operatori privat.

“Me propozim-vendim të ri parashihet që parkingjet publike të jepen në shfrytëzim dhe menaxhim përmes koncesionit ose partneritetit publik-privat. Kjo do të thotë se ky shërbim publik dhe të ardhurat nga parkimi mund të kalojnë në duart e një operatori privat”, deklaroi Murati.

Ai ka kërkuar sqarime nga autoritetet komunale për arsyet e zgjedhjes së këtij modeli dhe për ndikimin që ai mund të ketë mbi qytetarët.

“Pse nga autoritetet e Komunës po zgjidhet ky model? Kush do të përfitojë nga ky model? Cilat janë garancitë se çmimet nuk do të rriten dhe se interesi publik do të mbrohet?”, pyeti ai.

Në fund, Murati theksoi se, sipas tij, çdo vendim që lidhet me parkingjet publike duhet të shoqërohet me transparencë dhe debat të gjerë publik.

“Duke konsideruar se parkingjet publike janë pasuri e qytetarëve, kërkoj që përpara çdo vendimi të tillë të ketë transparencë të plotë, debat publik dhe llogaridhënie”, u shpreh koordinatori i këshilltarëve të opozitës në Këshillin Komunal të Tetovës. Gazeta Flaka