Bujar Osmani: BE nuk është vetëm proces negociatash, por sistem vlerash
Botuar nga Flaka
Në kuadër të Akademisë Politike të Bashkimit Demokratik për Integrim, ligjërues ishte Dr. Bujar Osmani, i cili trajtoi temën e integrimit evropian përtej procedurave dhe formaliteteve, duke ofruar një qasje më të gjerë mbi kuptimin e rrugës drejt Bashkimit Evropian.
Gjatë diskutimit, Osmani theksoi se procesi i integrimit evropian nuk duhet parë vetëm si përmbushje e kritereve teknike dhe negociata politike, por si një transformim i thellë i shoqërisë dhe institucioneve.
“Integrimi evropian nuk është thjesht një proces administrativ apo diplomatik. Ai nënkupton ndërtimin e institucioneve të forta, garantimin e sundimit të ligjit dhe krijimin e mundësive të barabarta për të gjithë qytetarët”, u shpreh Osmani.
Sipas tij, Bashkimi Evropian duhet kuptuar si një sistem vlerash që promovon demokracinë, liritë themelore dhe përgjegjësinë institucionale.
“Evropa nuk është vetëm një projekt politik. Ajo është një komunitet vlerash ku respekti për ligjin, barazia dhe dinjiteti njerëzor janë themeli mbi të cilin ndërtohen shoqëritë moderne”, theksoi ai.
Nga Akademia Politike e BDI-së vlerësuan se ligjërata solli një perspektivë më të gjerë mbi procesin integrues, duke i ndihmuar pjesëmarrësit të kuptojnë sfidat dhe përgjegjësitë që shoqërojnë rrugën drejt anëtarësimit në Bashkimin Evropian.
Dr. Bujar Osmani është doktor i shkencave mjekësore, kirurg specialist dhe një nga figurat më të njohura të diplomacisë dhe politikës në Maqedoninë e Veriut. Ai ka ushtruar funksionet e Ministrit të Shëndetësisë, Zëvendëskryeministrit për Çështje Evropiane dhe Ministrit të Punëve të Jashtme, ndërsa në vitin 2023 shërbeu si Kryesues i OSBE-së. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
