Bujar Osmani: Ditë e zezë për shqiptarët, Tito rikthehet në Tetovë

Nënkryetari i BDI-së, Bujar Osmani, ka reaguar ashpër pas vendimit të Gjykatës Kushtetuese për anulimin e vendimit mbi emërtimet e rrugëve dhe shesheve në Tetovë, duke e cilësuar atë si “një ditë të zezë për shqiptarët”.

Sipas Osmanit, vendimi rikthen emërtimin “Marshal Tito” në vend të sheshit “Iliria”, gjë që ai e konsideron një goditje ndaj identitetit shqiptar dhe bashkëjetesës ndëretnike në vend.

“DITË E ZEZË PËR SHQIPTARËT. Gjykata Kushtetuese anuloi vendimin për emërtimet e rrugëve dhe shesheve në Tetovë, duke rikthyer emrin ‘Marshal Tito’ në vend të sheshit ‘Iliria’. Një tjetër goditje ndaj identitetit shqiptar. Një tjetër plagë mbi të ardhmen e përbashkët. Një tjetër hap prapa për këtë vend”, ka shkruar Osmani.

Ai ka drejtuar kritika edhe ndaj kryetarit të Komunës së Tetovës, Bilall Kasami, duke e lidhur vendimin me qeverisjen aktuale.

“Në fund, Bilall Kasami duhet të jetë i lumtur. Dikur shkruante poezi për Titon. Sot, Tito u kthye në Tetovë gjatë qeverisjes së tij dhe VLEN-it. Shqiptarët nuk do ta harrojnë”, është shprehur Osmani.

Në një reagim të veçantë lidhur me vendimmarrjen në Gjykatën Kushtetuese, Osmani paralajmëroi se mbivotimi etnik në çështje që prekin identitetin dhe komunitetet etnike mund të ketë pasoja serioze për marrëdhëniet ndëretnike.

“Historia e shteteve multietnike dëshmon një rregull të thjeshtë: mbivotimi etnik për çështje etnike është fillimi i çdo krize të madhe ndëretnike”, ka deklaruar Osmani.

Reagimi vjen pasi Gjykata Kushtetuese vendosi të shfuqizojë aktet komunale që kishin të bënin me emërtimin e disa rrugëve dhe shesheve në Tetovë, vendim që ka nxitur reagime të shumta në skenën politike shqiptare.Gazeta Flaka