Bujar Osmani, një tjetër nivel – Shërbimi ndaj komunitetit mbi karrierën ndërkombëtare

Editorial Flaka

Në një kohë kur diplomacia është kthyer në një nga armët më të rëndësishme për ruajtjen e stabilitetit dhe përparimin ndërkombëtar të shteteve të vogla, emri i Bujar Osmanit u bë sinonim i suksesit dhe përfaqësimit dinjitoz në skenën globale.

Nga kryesimi historik i Maqedonisë së Veriut me OSBE-në, deri te përballja me një Rusi provokative në Këshillin e Sigurimit – Osmani ka treguar përvojë, kurajo dhe vizion të pakrahasueshëm.

Që nga janari i vitit 2023, kur Maqedonia e Veriut mori drejtimin e Organizatës për Siguri dhe Bashkëpunim në Evropë (OSBE) – një nga organizatat më të mëdha ndërkombëtare në botë – Bujar Osmani udhëhoqi me pjekuri dhe përgjegjësi. Nën udhëheqjen e tij, OSBE navigoi në ujëra të trazuara të konflikteve dhe krizave ndërkombëtare, duke u vlerësuar si një nga presidencat më të suksesshme të dekadës.

Në një takim të rëndësishëm në Departamentin e Shtetit Amerikan, Osmani u prit nga zëvendëssekretarja Vendi Sherman, e cila shprehu publikisht mirënjohjen dhe respektin e SHBA-së për rolin dhe profesionalizmin e tij.

Nuk është e zakonshme që një ministër shqiptar nga Maqedonia e Veriut të kthehet në figurë kyçe të diplomacisë europiane. Por Bujar Osmani nuk është i zakonshëm. Ai theu stereotipat dhe tregoi se një shqiptar, me vizion dhe integritet, mund të jetë lider i vërtetë në platforma ndërkombëtare.

Në shtator 2023, në një nga mbledhjet më të rëndësishme të Këshillit të Sigurimit të OKB-së, ku Shqipëria kishte kryesimin, Osmani ishte i ftuar si përfaqësues i OSBE-së. Reagimi i Rusisë, e cila kundërshtoi pjesëmarrjen e tij, vetëm e theksoi rëndësinë që ai kishte në arenën ndërkombëtare. Edi Rama, në një qëndrim të qartë dhe të prerë, mbrojti Osmanin, duke deklaruar:

“Ai është një shqiptar nga Maqedonia e Veriut, por nëse jeni më eksplicit se cili është problemi, jam i gatshëm t’iu ndihmojë.”

Ky ishte një moment ku një shqiptar u mbrojt publikisht në një forum global, për shkak të vlerave, arritjeve dhe kontributit të tij real.

Nuk është vetëm Edi Rama që ka lavdëruar Osmanin. Kryeministri shqiptar e cilësoi atë si:

“Një person që do isha shumë i lumtur sikur të kishim mundësinë ta kishim në dispozicion në qeverinë e Shqipërisë.”

Ky vlerësim nuk është formalitet. Është një shenjë e qartë se Bujar Osmani ka tejkaluar kufijtë nacionalë dhe është shndërruar në kapital diplomatik për gjithë shqiptarët kudo që janë.

Nën drejtimin e tij si ministër i Jashtëm, Maqedonia e Veriut u pranua në Unionin për Mesdheun (UM) në nëntor të vitit 2022, me 42 shtete që dhanë mbështetje unanime. Ky ishte një tjetër sukses strategjik që i hapi vendit dyert e një rrjeti diplomatik dhe ekonomik të gjerë, që përfshin të gjitha shtetet e BE-së dhe vendet përreth Mesdheut.

Bujar Osmani përfaqëson atë çfarë i duhet Ballkanit dhe Evropës Juglindore: diplomat me vizion, të arsimuar, poliglot, përfaqësues të barazisë dhe integrimit real të pakicave. Ai është shembulli më i mirë i një politikani të gjeneratës së re, që nuk sundon me retorikë boshe, por me rezultate konkrete.

Emri i Bujar Osmanit është tashmë pjesë e historisë së diplomacisë moderne shqiptare. Nga Uashingtoni në Bruksel, nga Viena në Kombet e Bashkuara – ai përfaqëson denjësisht shqiptarët dhe shtetin që përfaqëson. Me integritet, urtësi dhe vendosmëri, Osmani është bërë zëri i arsyes në kohë të krizave, një model i lidershipit të përgjegjshëm dhe fytyra moderne e diplomacisë shqiptare në shekullin XXI.

Bujar Osmani nuk ishte thjesht një ministër i jashtëm – ai ishte simbol i transformimit, përfaqësimit dhe aspiratave europiane të shqiptarëve.

Duke pasur parasysh gjithë këtë bagazh të jashtëzakonshëm diplomatik, hyrja e Bujar Osmanit në garën për Komunën e Çairit është më shumë se një akt modestie — është një dëshmi e fortë e ndershmërisë dhe përkushtimit të tij ndaj komunitetit. Kur një politikan i kalibrit ndërkombëtar pranon të zbresë në pushtet lokal, ai dërgon një mesazh të qartë: se nuk e sheh politikën si privilegj, por si shërbim.

Në një kohë kur Çairi është shndërruar në simbol të keqqeverisjes urbane, të akuzave për mafie ndërtimore, legalizime të paligjshme dhe korrupsion të përhapur, vendimi i Osmanit për të kandiduar është akt guximi dhe përgjegjësie. Ai nuk vjen për të premtuar, por për të vendosur rend dhe transparencë në një realitet që ka degraduar përtej çdo limiti të tolerueshëm.