Rrjetet sociale përballë parlamentit britanik për ndikimin te fëmijët

Drejtuesit ekzekutivë të disa prej platformave më të mëdha të rrjeteve sociale në botë, përfshirë Meta Platforms, Roblox Corporation dhe TikTok, kanë mohuar pretendimet se platformat e tyre krijojnë varësi te fëmijët dhe të rinjtë.

Ata u paraqitën para një komiteti parlamentar në Westminster, në Mbretërinë e Bashkuar, ku u diskutua ndikimi i kohës para ekranit dhe përdorimi i rrjeteve sociale nga të miturit.

Gjatë seancës, përfaqësuesit e kompanive këmbëngulën se platformat nuk janë të dizajnuara për të shkaktuar varësi dhe se nuk ekzistojnë prova që ato janë “në thelb varësuese”. Megjithatë, qëndrimi i tyre u prit me skepticizëm nga ligjvënësit.

Ndërkohë, një përfaqësues i Snap Inc. anuloi pjesëmarrjen në minutën e fundit, gjë që shkaktoi reagime të forta nga kryetarja e komitetit, e cila paralajmëroi masa të detyrueshme nëse kompania nuk paraqitet në seancën e radhës.

Debati vjen në një kohë kur qeveria britanike po shqyrton masa të reja për kufizimin e aksesit të të miturve në rrjetet sociale, duke marrë si shembull edhe politikat e aplikuara në Australi.

Përfaqësuesit e Metës në Mbretërinë e Bashkuar argumentuan se një ndalim i tillë nuk do të ishte efektiv, duke theksuar se përdorimi i platformave vazhdon edhe në vendet ku ekzistojnë kufizime.

Seanca parlamentare vjen gjithashtu pas një vendimi gjyqësor në Los Angeles, ku Meta dhe YouTube u shpallën përgjegjëse për dizajnimin e produkteve që mund të krijojnë varësi, vendim që kompanitë kanë njoftuar se do ta apelojnë.

Flaka