Detaje të reja nga aksidenti tragjik i Jotas dhe vëllait tij

Bota e futbollit është zhytur në zi pas lajmit tragjik për vdekjen e sulmuesit të Liverpool-it, Diogo Jota, dhe vëllait të tij, André Silva, në një aksident të rëndë automobilistik në orët e para të mëngjesit të së enjtes, më 3 korrik, në Zamora të Spanjës.

Detajet e aksidentit

Sipas autoriteteve spanjolle, Lamborghini Huracán me të cilin po udhëtonin dy vëllezërit shpërtheu në flakë pas një shpërthimi të dyshuar të gomës gjatë një parakalimi në autostradën A-52, në Palacios de Sanabria. Policia konfirmoi se Diogo Jota ishte në timon në momentin e aksidentit dhe se makina po udhëtonte me një shpejtësi të konsiderueshme mbi kufirin e lejuar prej 120 km/h.

Zëdhënësi i Guardia Civil deklaroi:

“Të gjitha provat e deritanishme tregojnë se drejtuesi i automjetit ishte Diogo Jota. Gjurmët e gomave dhe dëmtimet në rrugë po analizohen për të përcaktuar saktësisht shpejtësinë dhe rrethanat e aksidentit.”

Një humbje e dyfishtë

Diogo Jota, 28 vjeç, ishte baba i tre fëmijëve dhe kishte kurorëzuar dashurinë e tij me Rute Cardoso vetëm 11 ditë para tragjedisë. Vëllai i tij, André Silva, 25 vjeç, ishte gjithashtu futbollist, aktiv në ligën e dytë portugeze.

Të dy u gjetën të vdekur në vendin e ngjarjes, ndërsa makina e tyre ishte përfshirë nga flakët. Pamjet nga vendi i aksidentit tregojnë mbetje të djegura të automjetit dhe dëmtime të mëdha në rrugë.

Homazhe dhe funeral në Portugali

Funerali i vëllezërve u mbajt të shtunën në qytetin e tyre të lindjes, Gondomar, pranë Portos. Në ceremoni morën pjesë familjarë, bashkëshortja e Jotës, Rute Cardoso, bashkëlojtarë të Liverpool-it dhe figura të njohura të futbollit portugez dhe ndërkombëtar.

Në stadiumin “Anfield” të Liverpool-it, tifozët kanë vendosur lule, shalla dhe fanella në nder të Jotës, ndërsa klubet anembanë Evropës kanë mbajtur një minutë heshtje para ndeshjeve dhe stërvitjeve.

Flaka