“Do kërkojnë me qiri argat” – Limani ironizon VLEN-in në mbrojtje të Meidanit

Fatmir Limani del hapur në mbrojtje të ambasadorit të Shqipërisë në Shkup, Denion Meidani, duke dërguar njëkohësisht mesazh kritik ndaj koalicionit VLEN, pas sulmeve dhe distancimeve politike që u bënë ndaj qëndrimeve të ambasadorit në lidhje me protestat studentore shqiptare.

Përmes një postimi simbolik me titullin “VËLLAU”, Limani përdori një tregim metaforik për të përshkruar situatën aktuale politike, duke nënvizuar se “vëllau i mirë të mbron edhe kur gabon e lere kur s’ke asnjë faj”, në një mesazh që shihet qartë si mbështetje për Meidanin dhe kritikë ndaj atyre që, sipas tij, po e sulmojnë ose po e braktisin ambasadorin për kalkulime politike.

“Ishte bërë i ashpër dhe i pa’arsyeshëm në qëndrime… Të gjithë kundërshtarët e dënuan: ‘Nuk meriton mëshirë…!’ Vetëm vëllau i tij shkoi ta takonte”, shkruan Limani në postimin e tij.

Në fund të mesazhit, ai lëshon edhe një thumb të drejtpërdrejtë politik ndaj VLEN-it:

“U ka hyrë sherri në mes…, do kërkojnë me qiri (ditën), por s’do gjejnë ‘argat’ sikurse….”

Postimi vjen në kohën kur në kampin shqiptar në pushtet janë shtuar tensionet rreth protestave studentore dhe reagimeve ndaj përfshirjes morale e publike të ambasadorit shqiptar në mbështetje të studentëve shqiptarë në Shkup. Gazeta Flaka