Familjes me katër anëtarë i duhen mbi 1.100 euro në muaj për mbijetesë

Shporta minimale sindikale për një familje me katër anëtarë në muajin qershor ka arritur në 68.654 denarë, sipas të dhënave të publikuara nga Lidhja e Sindikatave të Maqedonisë. Sipas përllogaritjeve, vetëm për ushqim nevojiten 25.120 denarë, ndërsa për shërbime bazë 6.379 denarë.

LSM thekson se shporta minimale ka shënuar një ulje të lehtë krahasuar me majin 2026, kur ishte 68.742 denarë, pra një diferencë prej 88 denarësh. Po ashtu, sipas tyre, kostoja e qirasë për një banesë prej 60 metrash katrorë arrin deri në 84.024 denarë.

Nga ana tjetër, kryeministri Hristijan Mickoski ka kundërshtuar interpretimin se bëhet fjalë për shportë minimale, duke e cilësuar atë si “shportë mesatare”, duke theksuar se ekonomia e vendit po përballet me inflacion më të ulët krahasuar me rajonin.

“Greqia është mbi 5 për qind inflacion, Bullgaria mbi 6 për qind, Rumania afër dyshifrorit… Ne jemi ndër më të ulëtit në rajon,” deklaroi Mickoski, duke shtuar se Maqedonia e Veriut renditet ndër vendet me inflacion më të kontrolluar në rajon.

Ai paralajmëroi gjithashtu ulje të çmimeve të karburanteve, me pritje që të hënën benzina të ulet për 4 denarë dhe nafta për 7 denarë, si rezultat i stabilizimit të tregjeve globale dhe zhvillimeve gjeopolitike.

Qeveria pritet të mbajë takim me marketet dhe distributorët për të diskutuar çmimet e produkteve bazë, pas shqetësimeve se uljet nuk po reflektohen në tregun final. Po ashtu, paralajmërohen ndryshime ligjore që do të rrisin ndjeshëm gjobat për tregtarët që manipulojnë me çmimet. Gazeta Flaka