Flaka thumbon: Qoku me smartphone, inteligjenca parlamentare në ngritje!

Bekim Qoku, deputeti i VLEN-it që për pak do na tregonte edhe se kush e shpiku rrotën, ka zbuluar me krenari se disa prej figurave politike shqiptare – Ali Ahmeti, Sadulla Duraku dhe Musa Xhaferi – përdorkan ende telefona Nokia. Por ajo që harroi të përmendë është se vetë ka kaluar vetëm rishtazi nga “Nokia me dritë jeshile” te një smartphone me Face ID, dhe këtë e sheh si shenjë rilindjeje intelektuale.

“Tash që kam smartphone, jam edhe më smart. Kështu funksionon, apo jo?” – tha Qoku teksa mundohej të hapte aplikacionin e mesazheve pa e prekur ekranin me gishta të djersitur nga entuziazmi.

Burime të afërta me VLEN-in thonë se telefoni i ri ka sjellë ndryshime dramatike në jetën e deputetit:

• Ka filluar të përdorë Google para se të flasë në konferenca shtypi.
• Merr pjesë në grupe WhatsApp ku nuk i thonë më “mute”.
• Ka filluar të kuptojë se kur thua diçka për të tjerët, duhet të shikosh edhe veten në “selfie cam”.

Zërat në Kuvend thonë se kolegët janë në ankth: nëse Qoku vazhdon me këtë ritëm, rrezikon të bëhet deputet funksional – një skenar që askush nuk e kishte parashikuar.

“Smartphone është vetëm fillimi. Tani pritet të shkarkojë edhe ndonjë aplikacion për logjikë politike,” – u shpreh një koleg anonim nga opozita, ndërkohë që shkarkonte aplikacionin për horoskopin ditor të VLEN-it.

Në fund të ditës, një qytetar e përmblodhi më së miri situatën:

“Nëse një telefon e bën smart, imagjino çfarë do ndodhte po të kishte ndonjë ide të vetën…”

“Lajmi që s’na duhej” është rubrikë satirike. Çdo ngjashmëri me realitetin është më shumë reale se satirike. Qëndrimet janë të autorit, jo të redaksisë – të paktën deri në emërimet e reja. Flaka Media