Gostivari në zi: Ndahet nga jeta Halit Elezi – Lito, figurë e angazhuar publike

Sot, me 28 Prill 2026 është ndarë nga jeta në moshën 41 vjeçare Halit Elezi – Lito, ekonomist nga Gostivari, i njohur për angazhimin e tij profesional dhe publik.

Halit Elezi ishte i punësuar në Drejtorinë për të Ardhura Publike në Gostivar dhe njëkohësisht i angazhuar në Komisionin Komunal Zgjedhor. Ai njihej gjithashtu si aktivist dhe veprimtar politik, i përkushtuar në jetën shoqërore dhe institucionale të kohës.

Humbja e tij e parakohshme është pritur me pikëllim në mesin e familjarëve, miqve dhe bashkëpunëtorëve, duke lënë pas kujtimin e një njeriu të angazhuar dhe të respektuar në komunitet.

Që në ditët e para të funksionimit, Halit Elezi iu bashkua rrugëtimit të redaksisë “Flaka”, duke kontribuar në sektorin e financave dhe duke u kujdesur me përkushtim për kontabilitetin e subjektit tonë. Me punën e tij të saktë dhe seriozitetin profesional, ai la gjurmë të respektueshme në organizimin e brendshëm të redaksisë. “Flaka” shpreh ngushëllimet më të sinqerta për familjen Elezi nga fshati Çajlë, duke ndarë dhimbjen për këtë humbje të parakohshme.

Halit Elezi, i lindur më 2 prill 1985, ka lënë pas vetes bashkëshorten dhe dy fëmijët e tij. Ai do të kujtohet nga familjarët dhe të afërmit si një njeri i dashur dhe i respektuar, duke lënë pas një trashëgimi të çmuar familjare dhe njerëzore. Qoftë i përjetshëm kujtimi i tij. Gazeta “Flaka