Interi nuk e përjashton shitjen e Çalhanoglu-së – në garë Arabia dhe Galatasaray

E ardhmja e Hakan Çalhanoglu te Interi është vënë në pikëpyetje. Mesfushori turk, që këtë sezon ka qenë dirigjenti i padiskutueshëm i mesfushës zikaltër dhe një nga liderët e skuadrës së Simone Inzaghit, është bërë objektiv i disa klubeve jashtë Europës, mes të cilave edhe emra të njohur nga Arabia Saudite, por edhe Galatasaray, që po tenton një rikthim të bujshëm të tij në Turqi.

Sipas raportimeve nga mediat italiane dhe turke, Galatasaray është gati t’i ofrojë Çalhanoglu-së një kontratë prej 10 milionë eurosh në vit, një shifër shumë e lartë për standardet e futbollit turk dhe tërheqëse për një lojtar 31-vjeçar që po mendon për të ardhmen e tij profesionale dhe personale.

Çalhanoglu vetë nuk e ka përjashtuar mundësinë e largimit. Në të kaluarën ai ka deklaruar hapur se dëshiron të luajë në kampionatin turk përpara se të tërhiqet nga futbolli. Prandaj, këto oferta, sidomos nga Galatasaray – klubi më i titulluar në Turqi – mund të jenë shumë serioze.

Nga ana tjetër, Interi nuk është indiferent ndaj situatës. Pavarësisht rëndësisë që ka lojtari në skemat e trajnerit Inzaghi, drejtuesit e klubit janë të gatshëm të shqyrtojnë një ofertë të rëndësishme financiare, sidomos nëse kalon shifrën 40 milionë euro. Duke qenë se Çalhanoglu u transferua falas nga Milani në vitin 2021, çdo shitje do të sillte një fitim të pastër në bilancet e klubit.

Në rast largimi, Interi ka nisur të shqyrtojë alternativat për zëvendësimin e tij. Emri më i përfolur është ai i Nicolò Rovella, mesfushorit të ri të Lazios. I talentuar, teknikisht i përgatitur dhe me profilin e përshtatshëm për stilin e zikaltërve, Rovella shihet si një investim strategjik për të ardhmen.

Për momentin, merkatoja mbetet e hapur dhe vendimi përfundimtar i takon Çalhanoglu-së. A do të zgjedhë ai të mbetet në majat e futbollit evropian me Interin, apo do të hapë një kapitull të ri jashtë kontinentit të vjetër?

Flaka