Ish-ylli i Real Madridit deklaron se Carvajal e meriton ta fitojë Topin e Artë në vend të Viniciusit

Më vonë gjatë këtij muaji do të dhurohet çmimi Topi i Artë 2024 nga France Football. Të gjitha shenjat bëjnë me dije se Vinicius Junior do ta fitojë për herë të parë.

Sidoqoftë, jo të gjithë besojnë se Vinicius e meriton të jetë fituesi i këtij çmimi. Në fakt, ish-bashkëlojtari i tij Joselu Mato preferon që ky çmim t’i dhurohet Dani Carvajalit.

“Do t’ia dhuroja Carvajalit. Ne po flasim për një lojtar i cili luajti gjithçka vitin e kaluar, i cili ka fituar të njëjtët trofe si Vini, të cilin e vlerësoj dhe e dua shumë si bashkëlojtar, por mendoj se Dani e ka mbaruar sezonin si lojtari më i mirë në finalen e Ligës së Kampionëve dhe ka fituar Kampionatin Evropian aty ku ishte shumë i rëndësishëm”.

“Në fund, meritat nuk shkojnë për një mbrojtës sepse ai është më shumë protagonist si dikush që shënon gola ose asiston, por ne e kemi parë Danin si një golashënues, i cili ka shënuar dhe ka dhuruar asistime, ka qenë i rëndësishëm dhe ka bërë ndeshje të jashtëzakonshme”.

“Ai është një kandidat serioz për ta fituar këtë çmim sepse ka kaluar një kohë e gjatë që prej se e kemi parë një futbollist me këto kushte dhe titujt që ka fituar vitin e kaluar do ta bënin një fitues të drejtë të Topit të Artë”, ka thënë Joselu.

Joselu ishte bashkëlojtar me Vinicius dhe Carvajal vetëm për një sezon, i cili ishte i paharrueshëm për veteranin spanjoll. Ai u transferua tek Al-Gharafa në verë, ani pse ende e sheh veten si pjesë e Real Madridit.

“Që nga dita e parë ata më kanë trajtuar si njërin prej tyre. Ta ndjejë se jam në klubin më të mirë në botë nga presidenti, trajneri, bashkëlojtarët. Ta vesh atë fanellë dhe të luajë në atë stadium është diçka për të cilën ëndërroni gjatë tërë jetës”, deklaroi spanjolli.