Kallajxhiev: Rasti i Grubit është i montuar që nga fillimi

“Cirku me festimin e lirimit të Grubit nga paraburgimi është një skenar i njohur i bllokut politik shqiptar dhe nuk kontribuon në ndërtimin e besimit”, thotë profesori Kallajxhiev për „Lokalno“.

Ish-zëvendëskryeministri i parë, Artan Grubi, i cili është i akuzuari i dytë në rastin „Lotaria Shtetërore“, doli nga arresti shtëpiak pasi masa iu hoq me fuqinë e ligjit. Dy net më parë, në Çair të Shkupit, bashkëqytetarët e tij e pritën me flakadanë dhe bomba tymuese.

Grubi doli nga arresti shtëpiak pardje, pasi skadoi afati maksimal ligjor për këtë masë. Sipas njoftimit të gjykatës, në përputhje me nenin 470 të Ligjit për Procedurën Penale (LPP), masa e paraburgimit, përkatësisht arresti shtëpiak, pas paraqitjes së aktakuzës nga prokuroria, nuk mund të zgjasë më shumë se 60 ditë.

Mbrojtja pretendon se Grubi nuk ka qenë organizator dhe se tubimi nuk kishte karakter politik. Ajo distancohet nga ngjarja. Një pjesë e opinionit publik është e indinjuar nga triumfalizmi dhe festimi, duke shtruar pyetjen nëse sistemi i drejtësisë është shndërruar në një „skenë teatri“.

Profesori universitar dhe njohësi i zhvillimeve, Gordan Kallajxhiev, thotë se rasti i Grubit është politizuar, përkatësisht montuar, që nga fillimi.

Sipas tij, çështja me „Lotarinë“ nuk është penale dhe është mjaft kontradiktore.

„Bëhet fjalë për atë nëse ‘Lotaria Shtetërore’ ka të drejtë të organizojë lojëra elektronike të fatit, prandaj nuk është edhe aq e qartë nëse ka pasur fare ndonjë dëm për ‘Lotarinë Shtetërore’. Mendoj se nuk ka bazë për përgjegjësi penale.

Nga ana tjetër, cirku me festimin e lirimit të tij nga paraburgimi është një skenar i njohur i bllokut politik shqiptar dhe nuk kontribuon në ndërtimin e besimit“, thekson profesori në një deklaratë për „Lokalno“.

Rasti i Iva Mihailovës, si një serial televiziv turk

Një tjetër rast që po trazon opinionin publik në Maqedoninë e Veriut, por edhe në vendin fqinj, Bullgari, është arratisja e Iva Mihailovës.

Ministria e Punëve të Brendshme (MPB) ende po heton se si Mihailova, e akuzuar për një aksident trafiku ku humbi jetën një person dhe u lënduan tre të tjerë, arriti të largohej nga Maqedonia. Për të është shpallur fletarrest ndërkombëtar dhe i është caktuar masa e paraburgimit prej 30 ditësh. Autoritetet po hetojnë nëse ajo e ka kaluar kufirin në mënyrë të ligjshme.

Departamenti për Kontroll të Brendshëm, Hetime Kriminalistike dhe Standarde Profesionale po ndërmerr veprimet përkatëse për të përcaktuar rrethanat e rastit.

Ministria e Drejtësisë pret njoftim zyrtar nga MPB-ja nëse Mihailova është arrestuar apo lokalizuar në një shtet tjetër, në mënyrë që të mund të nisë procedura e ekstradimit.

Megjithatë, kjo nuk do të thotë se autoritetet bullgare janë të detyruara ta arrestojnë dhe ta dorëzojnë automatikisht te institucionet maqedonase, pasi, sipas ligjit, shtetasit bullgarë nuk ekstradohen.

Në skenën politike vazhdojnë akuzat mes pushtetit dhe opozitës. VMRO-DPMNE-ja i drejtohet drejtpërdrejt Filipçes me pyetjen nëse është e vërtetë që ai, së bashku me Zaevin, u kanë premtuar bashkëpunëtorëve të afërt të Rumen Radevit se mund të përgatisin një raport mjekësor për Mihailovën, sipas të cilit trajtimi i saj i mëtejshëm nuk mund të kryhej në Maqedoni, por në Bullgarinë fqinje.

„Pas shpinës së popullit, nën radar, u morën vesh me Bullgarinë dhe e lejuan Iva Mihailovën të kalonte kufirin“, thonë nga partia opozitare.

Sipas tyre, thirret ambasadori bullgar, shpallet fletarresti, kërkohet paraburgimi, përgjegjësia i kalohet dikujt tjetër dhe zhvillohet një fushatë mediatike, ndërsa fajtorë paraqiten Filipçe, Zaev dhe LSDM-ja.

Kallajxhiev mendon se rasti i Ivës i ngjan një seriali televiziv turk.

„Mediat dhe politika i japin rëndësi të panevojshme. Maqedonia do të kërkojë ekstradimin dhe pothuajse me siguri nuk do ta marrë atë. Nga pikëpamja juridike, Bullgaria duhet ta gjykojë atje, por as nga kjo nuk do të ketë asgjë.

Në fund të fundit, nuk është dënim i vogël edhe fakti që Iva nuk do të mund të vijë më kurrë në Maqedoni dhe, me gjasë, as të udhëtojë në shtete të treta që mund ta dorëzojnë atë. Teorikisht, është e mundur edhe të gjykohet në mungesë, ndërsa dënimin ta vuajë në Bullgari.

Gjëja më qesharake është se si bullgarët tani na e përplasën në fytyrë rrëfimin për besimin prej 2 për qind“, thekson profesori.

Për të parandaluar raste të tilla, ministri i Punëve të Brendshme, Pançe Toshkovski, thotë se ndoshta duhet të shqyrtohen ndryshimet në masat e kujdesit për personat me shtetësi të dyfishtë evropiane, në mënyrë që, përveç pasaportave, t’u merren edhe letërnjoftimet. Gazeta Flaka