Klopp zbulon historinë e pabesueshme: Liverpool fluturoi me avion privat për të bindur Mbappen

Një moment mes Jürgen Klopp dhe Kylian Mbappe ka rikthyer në vëmendje një nga historitë më të pazakonta të merkatos së futbollit.

Trajneri gjerman ka zbuluar se në vitin 2017, Liverpool bëri një përpjekje spektakolare për të bindur Mbappen t’i bashkohej klubit anglez, në atë kohë kur sulmuesi francez ishte një nga talentet më të kërkuar në Evropë.

Sipas Klopp, drejtuesit e Liverpoolit organizuan një takim sekret me familjen e Mbappes në bordin e një avioni privat luksoz me pesë dhoma. Për të shmangur vëmendjen e publikut dhe mediave, avioni fluturoi për një kohë në rreth, ndërsa zhvillohej biseda.

“Ishte transferimi më i shtrenjtë që nuk e realizuam kurrë. Fluturuam nga Blackpool në Nice, ku e gjithë familja Mbappe hipi në një avion shumë të madh privat. Hëngrëm ushqim të mirë, biseduam dhe kaluam një kohë fantastike, por në fund ai zgjodhi Parisin”, rrëfeu Klopp.

Edhe vetë Mbappe ka treguar më herët se kishte zhvilluar bisedime me Liverpoolin, duke zbuluar se nëna e tij është prej kohësh tifoze e klubit anglez.

Historia u rikthye në qendër të vëmendjes pasi Klopp dhe Mbappe u panë duke buzëqeshur dhe duke treguar me gisht drejt nënës së futbollistit, duke kujtuar me humor episodin e pazakontë të vitit 2017, kur Liverpool ishte shumë pranë një prej transferimeve më të bujshme që nuk u realizuan kurrë.

Flaka