Kronologji a e krizës së ujit në Gostivar: Nga ndërhyrjet teknike deri te epidemia, arrestimet dhe hetimi penal

Analizë kronologjike – Flaka

Kriza e ujit në Gostivar nuk u shfaq brenda natës. Dokumentet dhe njoftimet zyrtare të publikuara nga institucionet gjatë periudhës qershor–korrik 2026 tregojnë një zinxhir ngjarjesh që fillon me ndërhyrje teknike në rrjetin e ujësjellësit, vazhdon me paralajmërime për pasigurinë e ujit, analiza kontradiktore laboratorike dhe kulmon me shpalljen e epidemisë gastrointestinale, arrestimin e tre drejtuesve të NP “Komunalec” dhe hapjen e hetimit nga Prokuroria.

Më poshtë është kronologjia e plotë e zhvillimeve.

15 qershor 2026

Fillojnë ndërhyrjet në rrjetin e ujësjellësit

NP “Komunalec” njofton ndërprerje të përkohshme të furnizimit me ujë në Debresh, Zdunjë, Banjicë të Epërme dhe Banjicë të Poshtme, për shkak të sanimit të një defekti në linjën e vjetër Ø250 të ujësjellësit.

Institucioni deklaron se furnizimi do të rikthehet pas përfundimit të intervenimit teknik.

24 qershor 2026

Për herë të parë pranohet se uji nuk është i sigurt për pije

NP “Komunalec” njofton se po kryhen aktivitete teknike për rritjen e presionit në rrjet.

Në njoftim thuhet qartë:

“Si pasojë e drejtpërdrejtë e këtyre punimeve, uji nuk është i sigurt për pije.”

Qytetarëve u kërkohet të mos konsumojnë ujin deri në publikimin e rezultateve laboratorike.

Ky është njoftimi i parë zyrtar që paralajmëron rrezik për konsumimin e ujit.

25 qershor 2026

Defekt i ri në rrjet

Komunaleci njofton ndërprerje të ujit në lagjen Maleardi.

Sipas ndërmarrjes, shkaku është dëmtimi i gypit nga punimet e kompanisë EVN.

Po këtë datë, sipas Prokurorisë, ndodh edhe veprimi që më vonë do të konsiderohet kyç në hetim.

Pretendimet e Prokurorisë

Sipas urdhrit për zhvillimin e hetimit:

• ushtruesja e detyrës së drejtores,
• drejtori teknik,
• përgjegjësi i ujësjellësit,

urdhëruan vendosjen e tre pompave zhytëse në një kanal me ujë sipërfaqësor pranë dhomës së tejmbushjes së sistemit të ujit të pijshëm.

Qëllimi, sipas dyshimeve të Prokurorisë, ishte testimi i presionit të ujit.

29 qershor 2026

Analizat deklarojnë se uji është i rregullt

Qendra për Shëndet Publik publikon rezultatet e analizave.

Në njoftim thuhet se:

• uji është bakteriologjikisht i pastër;
• parametrat fiziko-kimikë janë brenda normave;
• nuk ka ndotje bakteriale;
• nuk është evidentuar turbullirë e shtuar.

Mostrat ishin marrë javën paraprake nga katër pika, përfshirë kaptaZHën në Vrutok.

Ky njoftim krijon kontrast të fortë me zhvillimet që do të pasojnë.

3 korrik 2026

AUV ndalon përdorimin e ujit për pije

Agjencia e Ushqimit dhe Veterinarisë vendos ndalim të përkohshëm për konsumimin e ujit nga rrjeti publik.

Komunaleci njofton se masa është parandaluese dhe do të zgjasë deri në përfundimin e analizave laboratorike.

Qytetarëve u kërkohet të mos pinë ujë nga ujësjellësi.

16 korrik 2026

Inspektimi zbulon pompat ende në funksion

Sipas Prokurorisë, gjatë kontrollit në terren konstatohet se:

• dy nga tre pompat vazhdonin të punonin;
• ato transferonin ujë nga një kanal i hapur në dhomën e ujit të pijshëm.

Hetimi pretendon se kështu është përzier uji sipërfaqësor me ujin e sistemit publik të furnizimit.

17 korrik 2026

Ndalim i ri nga AUV

Agjencia e Ushqimit dhe Veterinarisë lëshon ndalim të ri për përdorimin e ujit, këtë herë për shkak të dyshimit të arsyeshëm për kontaminim.

Ky vendim bëhet baza e rekomandimeve të mëvonshme të institucioneve shëndetësore.

18 korrik 2026

Rriten rastet me simptoma gastrointestinale

Qendra për Shëndet Publik Tetovë njofton se është evidentuar shtim i rasteve me:

• të vjella;
• diarre.

Merren mostra të ujit dhe materiale të tjera biologjike për analiza.

Institucioni deklaron se shkaktari ende nuk është identifikuar.

20 korrik 2026

Publikohen rekomandimet shëndetësore

Institucionet rekomandojnë:

• moskonsumimin e ujit edhe pas zierjes;
• përdorimin vetëm të ujit të ambalazhuar;
• ndalimin e përdorimit të ujit për gatim, larje frutash, përgatitje akulli dhe ushqim për foshnja.

Paralajmërohen veçanërisht:

• fëmijët;
• gratë shtatzëna;
• të moshuarit;
• personat me sëmundje kronike.

20 korrik 2026

Shpallet epidemi gastrointestinale

Qendra për Shëndet Publik Tetovë shpall epidemi gastrointestinale në territorin e Komunës së Gostivarit.

Sipas institucionit, vendimi është marrë pas rritjes së numrit të rasteve dhe synon:

• koordinim më të mirë institucional;
• identifikimin e burimit të infeksionit;
• kufizimin e përhapjes së sëmundjes.

20 korrik 2026

Hapet hetimi penal

Prokuroria Themelore Publike Gostivar nis procedurë hetimore ndaj tre personave për veprën:

“Vepra të rënda kundër mjedisit jetësor dhe natyrës, të shkaktuara me ndotjen e ujit për pije.”

Sipas Prokurorisë:

• uji nga kanali kishte 2.419,6 cfu/100 ml baktere koliforme, ndërsa maksimumi i lejuar është 50 cfu/100 ml;
• në burimin e kapur u konstatuan 39 cfu/100 ml baktere koliforme, ndonëse standardi kërkon 0 cfu/100 ml;
• në një mostër nga çezma në rrugën JNA u mat 1,1 mg/l klor rezidual, mbi kufirin maksimal të lejuar prej 0,5 mg/l.

Prokuroria vlerëson se këto ndryshime e kanë bërë ujin të papërshtatshëm për konsum.

20 korrik 2026

Arrestohen tre drejtues të Komunalecit

Ministria e Punëve të Brendshme konfirmon arrestimin e:

• ushtrueses së detyrës së drejtores së NP “Komunalec”;
• drejtorit teknik;
• përgjegjësit të sektorit të ujësjellësit dhe kanalizimeve.

Arrestimet janë kryer në koordinim me Prokurorinë e Gostivarit.

20 Korrik 2026: Ministria e Shëndetësisë doli me dhënat më të reja. Nga atje thonë se është vërejtur një ulje fillestare e numrit të pacientëve të rinj të kontrolluar në Spitalin dhe Qendrën Shëndetësore të Gostivarit.

Sipas tyre, në mënyrë kumulative, deri tani në Spitalin e Përgjithshëm të Gostivarit janë evidentuar 1.554 pacientë, ndërsa në Qendrën Shëndetësore të Gostivarit 1.392.

Katër personat që ishin të hospitalizuar tashmë janë lëshuar për trajtim në shtëpi.
Deri tani janë dorëzuar 140 raportime zyrtare, të cilat po përpunohen nga ekipet epidemiologjike të Qendrës për Shëndet Publik në Tetovë dhe Institutit për Shëndet Publik. Gjithashtu janë kryer 81 anketa epidemiologjike.

Sa i përket trendit ditor të pacientëve të rinj, të dhënat tregojnë se gjatë ditës së djeshme janë evidentuar gjithsej 564 pacientë të rinj në spital dhe në qendrën shëndetësore, që paraqet ulje krahasuar me ditën paraprake, kur ishin regjistruar 649 pacientë të rinj dhe ishte shënuar numri më i lartë i kontrolleve brenda një dite.

Analizë

Kronologjia tregon se kriza kaloi në disa faza të dallueshme.

Fillimisht, institucionet flisnin për ndërhyrje teknike dhe probleme me presionin e ujit. Më pas u shfaqën paralajmërimet se uji nuk ishte i sigurt për konsum. Në fund të qershorit u publikuan analiza që e shpallnin ujin të rregullt, por vetëm pak ditë më vonë AUV vendosi ndalim për përdorimin e tij.

Në mesin e korrikut filluan të shtoheshin rastet e qytetarëve me simptoma gastrointestinale. Pas kontrolleve në terren, institucionet shëndetësore shpallën epidemi, ndërsa Prokuroria ngriti dyshime se ndotja mund të ketë ardhur si pasojë e ndërhyrjeve të kryera në sistemin e ujësjellësit.

Hetimi penal është ende në zhvillim dhe përgjegjësia përfundimtare do të përcaktohet vetëm pas përfundimit të procedurës gjyqësore. Megjithatë, dokumentet zyrtare tregojnë se ngjarjet nuk ishin të izoluara, por u zhvilluan në një periudhë më shumë se njëmujore, duke e shndërruar një problem teknik në një krizë të shëndetit publik me pasoja institucionale, penale dhe shoqërore. Gazeta Flaka