Kthimi i shumëpritur i Armend Rexhepagiqit – Kënga “Dashni e Vjetër” publikohet sonte

Pas një pauze të gjatë, një nga emrat më të dashur të muzikës shqipe, Armend Rexhepagiqi, rikthehet fuqishëm me këngën më të re “Dashni e Vjetër”, një baladë e thellë që ngërthen ndjenjën e nostalgjisë, dashurisë së humbur dhe elegancën muzikore që ka karakterizuar gjithmonë artin e tij, shkruan Flaka Media

Armend Rexhepagiqi, kantautori i njohur për hitet si “Ti nuk më meriton”, “Harrova”, “Kur dashuria vdes” dhe shumë të tjera, është një zë që ka shoqëruar breza të tërë shqiptarësh në kohë të vështira dhe të bukura. I njohur për tekstet e ndjera dhe stilin e tij të veçantë, ai ka lënë gjurmë të thella në historinë e muzikës shqipe që nga vitet ’90.

Në vitin 2006, Rexhepagiqi fitoi edhe çmimin e parë në “Kënga Magjike” me këngën “Kur dashuria vdes”, duke u shpallur edhe si kantautori më i mirë. Ndërkohë, përmes bashkëpunimit të ngushtë me partneren e tij në jetë dhe në art, Aida Baraku, ai ka krijuar këngë që kanë bërë epokë.

Pas rikthimit në skenë me një koncert shumë të pritur në Prishtinë në vitin 2023, Rexhepagiqi dëshmon edhe një herë se muzika e tij mbetet po aq e fuqishme dhe aktuale. “Dashni e Vjetër” vjen si një dëshmi e maturisë artistike dhe përjetimit emocional që vetëm një artist i këtij niveli mund ta transmetojë.

Publiku do të ketë mundësinë ta dëgjojë premierën ekskluzive të këngës sot, më 4 qershor, në ora 18:00, në kanalin zyrtar të artistit në YouTube dhe në të gjitha platformat muzikore. Flaka Media