Kurti: Masat e Vuçiqit, fushatë agresive për konflikte

Masat e presidentit të Serbisë, Aleksandar Vuçiq për Kosovën janë pjesë e fushatës agresive për konflikte të reja. Kështu ka deklaruar kryeministri i Kosovës, Albin Kurti, duke shtuar se kërkesat e Vuçiqit janë bërë nga një dëshpërim dhe nuk janë aspak paqësore dhe nuk kanë vend në Kosovë e as në rajon. Kurti u ndal te kushtet që ka vënë ai duke theksuar se ato janë paqësore dhe racionale.

“Së pari duhet të flisni për tri kushtet që i kam vënë unë, e që janë kushte paqësore dhe racionale, do të thotë janë dorëzimi në autoritetet kosovare i Millan Radojçiqit, është nënshkrimi i Marrëveshjes dhe është gjithashtu tërheqja e letrës së ish-kryeministres Bërnabiq, e cila tha që nuk e pranon as pavarësinë e Kosovës, as ulësen në OKB për Kosovën dhe as nuk e respekton integritetin territorial të Kosovës. Ato tri kushte janë paqësore dhe racionale. Ndërkaq ato kërkesat e tij, masat e tij bëhen nga një dëshpërim dhe paraqesin jo-racionalitet e nuk janë aspak paqësore, por përkundrazi pjesë e fushatës agresive për konflikte të reja që pa dyshim nuk kanë vend as në Kosovë.”, – deklaroi kryeministri i Kosovës, Albin Kurti.

Kurti nuk ka komentuar takimet në Bruksel të kryenegocitorëve nga Kosova dhe Serbia, Besnik Bislimi dhe Petar Petkoviqi, me emisarin evropian për dialog, Miroslav Lajçak.

Në takime është diskutuar për mënyrat si të shkohet tutje me zbatimin e marrëveshjes së arritur në Ohër në mars të vitit 2023, si dhe të gjitha çështjet tjera, të cilat sipas Stanos, po ndikojnë në normalizimin ndërmjet Kosovës dhe Serbisë.

Ky takim vjen një ditë pasi kryeparlamentari Glauk Konjufca deklaroi se dialogu Kosovë-Serbi për këtë vit është i vdekur. (TVM2)