Ligji kundër duhanit rikthehet në tavolinë, pritet zbatim i menjëhershëm pas miratimit

Ligji i ri për mbrojtje nga duhani pritet të shqyrtohet të martën në seancë qeveritare dhe, sipas autoriteteve, do të hyjë në fuqi menjëherë pas miratimit në Kuvend. Megjithatë, sektorit të hotelerisë do t’i jepet një periudhë tranzitore prej një viti për përshtatjen e objekteve me rregullat e reja.

Kryeministri Hristijan Mickoski paralajmëroi zbatim të rreptë të ligjit dhe kontrolle inspektuese në të gjithë territorin e vendit, duke theksuar se nuk do të ketë privilegje apo tolerancë për shkelësit.

Ministri i Shëndetësisë, Azir Aliu, sqaroi se ligji nuk ndalon prodhimin, importin, eksportin apo shitjen e produkteve të duhanit, por synon të rregullojë përdorimin dhe promovimin e tyre në hapësirat ku mund të rrezikohet shëndeti i të tjerëve.

Sipas Aliut, propozim-ligji sjell rregulla më të qarta për përdorimin e duhanit në hapësirat e mbyllura, tarracat, reklamimin, mbikëqyrjen dhe mbrojtjen e të miturve.

Ai theksoi se duhani lidhet me rreth 3.600 raste vdekjesh në vit në vend, që përbëjnë 13 për qind të totalit të vdekjeve, ndërsa kostoja ekonomike për trajtimin e pasojave të tij arrin mbi 600 milionë euro në vit.

Shqetësues, sipas ministrit, mbetet edhe përdorimi i produkteve të duhanit tek të rinjtë, pasi 13,6 për qind e grupmoshës 13–15 vjeç konsumojnë produkte me nikotinë, ndërsa 73 për qind e të rinjve duhanpirës deklarojnë se nuk janë penguar asnjëherë të blejnë cigare.

Ligji fillimisht ishte planifikuar të hynte në fuqi në mars të këtij viti, por u shty për rishikim pas reagimeve nga hotelierët dhe industria e duhanit. Gazeta Flaka