Lirim Mehmetaj: “Një damar shqiptarie po rreh në Shkup” – thirrje për mbështetje të studentëve shqiptarë

Gazetari kosovar Lirim Mehmetaj ka reaguar në lidhje me protestën e studentëve shqiptarë në Maqedoninë e Veriut, duke e cilësuar atë si një moment të rëndësishëm të zërit qytetar dhe kombëtar.

Në reagimin e tij publik, ai theksoi se studentët po bëjnë atë që, sipas tij, politika shqiptare nuk po e bën.

“Një damar shqiptarie po rreh në Shkup më shumë se kudo tjetër, me studentët shqiptarë që po bëjnë atë që politika shqiptare do të duhej po nuk e bën për ta”, deklaroi Lirim Mehmetaj.

Ai kritikoi gjithashtu institucionet shqiptare dhe përfaqësuesit politikë, duke thënë se shqiptarët në Maqedoninë e Veriut janë lënë vetëm në përpjekjen për të drejta themelore gjuhësore dhe arsimore.

“Me një shtet si Shqipëria që as nuk i kupton, me një shtet si Kosova që veç i pengon dhe me politikanë shqiptarë atje që zvarriten si bolla pa pikë dinjiteti për një post më shumë, studentët shqiptarë kanë mbetur vetëm në luftën për diçka krejt bazike”, u shpreh ai.

Sipas tij, kërkesa e studentëve është e qartë dhe e drejtë.

“Është një kërkesë e vetme: Studentët që studiojnë juridik në gjuhën shqipe, ta kenë mundësinë që edhe provimin e jurisprudencës ta mbajnë në po atë gjuhë, në gjuhën e vet”, theksoi Lirim Mehmetaj.

Ai shtoi se protesta e paralajmëruar para Ura e Gurit në Shkup është një moment që duhet të marrë mbështetje të gjerë qytetare dhe kombëtare. Gazeta Flaka