LSDM: Qeveria po e çon sistemin pensional drejt kolapsit, rrezikohen pensionet e ardhshme

LSDM ka akuzuar Qeverinë e udhëhequr nga Hristijan Mickoski për, siç thotë, përkeqësimin e gjendjes financiare të sistemit pensional, duke paralajmëruar se mungesa e mjeteve në Fondin për Sigurim Pensional dhe Invalidor (PIOM) rrezikon qëndrueshmërinë e pensioneve dhe të shtyllës së dytë pensionale.

Në një konferencë për media, anëtarja e Këshillit Ekzekutiv të LSDM-së, Renata Mladenovska, deklaroi se mungesa e mjeteve në PIOM ka arritur në 40 për qind, ndërsa, sipas saj, po vihet në pikëpyetje edhe funksionimi i shtyllës së dytë pensionale.

Ajo iu referua edhe deklaratës së guvernatorit Trajko Sllaveski, i cili, sipas saj, ka paralajmëruar se deri në 80 për qind e qytetarëve që do të pensionohen në periudhën 2030–2032 nuk do të arrijnë të sigurojnë as pensionin minimal.

Sipas LSDM-së, Qeveria po shqyrton mundësinë e dobësimit ose shfuqizimit të shtyllës së dytë pensionale, duke rikthyer kontributet e punëtorëve nga fondet private në fondin shtetëror PIOM.

“Nëse kjo ndodh, pensionistët e ardhshëm do të varen vetëm nga buxheti i shtetit, i cili tashmë ndodhet në një gjendje të rënduar financiare”, tha Mladenovska.

Ajo akuzoi gjithashtu Qeverinë për rritje të borxhit publik dhe menaxhim të dobët të financave publike.

“Për vetëm dy vjet, borxhi publik është rritur me 2.5 miliardë euro, ndërsa deficiti buxhetor i planifikuar për të gjithë vitin është shpenzuar që në gjysmën e parë të vitit”, deklaroi Mladenovska.

LSDM vlerëson se politikat aktuale financiare rrezikojnë stabilitetin afatgjatë të sistemit pensional dhe sigurinë financiare të pensionistëve të ardhshëm. Gazeta Flaka