Mbulohet me parulla lokali ku Vetëvendosje hapi shtabin në Shkup: “Liria nuk shitet”, “Mos përçani kombin”

Vitrina e lokalit ku Lëvizja Vetëvendosje ka hapur shtabin e saj zgjedhor në Shkup është mbuluar me një sërë parullash dhe mesazhesh politike, të vendosura në xhamat e objektit.

Në fotografitë e siguruara vërehen mbishkrime si: “Liria nuk shitet”, “Mos e shkel gjakun e lirisë”, “Amaneti tradhtohet?”, “Ata ranë, ju përçani?” dhe “Pushteti kalon, dëmi mbetet”, të shoqëruara edhe me mesazhe të tjera kritike ndaj përçarjes dhe interesave personale.

“Sa vlen përçarja?”, “Mos luani me gjakun”, “Mos përçani kombin”, “Kujt i shërbeni?”, “Kombi mbi interesat personale”, “Unitet, jo përçarje”, “A ju gjykon historia?” dhe “Shqiptarët nuk ndahen”, janë ndër mbishkrimet e vendosura në ballinën e lokalit ku Vetëvendosje hapi shtabin zgjedhor në Shkup.

Mbishkrimet janë pa gabime drejtshkrimore, çka ka nxitur vlerësime se personi apo personat që i kanë shkruar nuk janë persona të rrugës.

Parullat janë vendosur përreth materialeve promovuese të subjektit politik, duke e kthyer hyrjen e lokalit në një hapësirë me mesazhe të forta simbolike dhe politike.

Parullat u larguan vetëm pasi u vunë re nga personeli i shtabit. Deri më tani nuk ka informacion zyrtar se kush qëndron pas vendosjes së tyre dhe nëse për këtë rast do të ketë reagim nga përfaqësuesit e subjektit politik apo institucionet kompetente. Gazeta Flaka