Michel Rojkind zbret në Çair -Osmani: Do të ketë një plan afatgjatë për zhvillim
Botuar nga Flaka
Kandidati për kryetar të Komunës së Çairit, Bujar Osmani, njoftoi sot se bashkë me arkitektin me famë botërore, Michel Rojkind, ka nisur punën për një vizion të ri të rilindjes urbane të komunës.
“Sot me Michel Rojkind, një nga arkitektët më të njohur në botë, shëtitëm nëpër lagjet e Çairit. E dëgjova me vëmendje ndërsa analizonte rrugët, hapësirat, njerëzit dhe krijonte vizionin për Çairin,” u shpreh Osmani.
Ai theksoi se gjatë javëve të fundit po punohet në mënyrë intensive për një projekt që do t’i japë Çairit një strategji të qartë zhvillimi:
“Çairi më në fund do të ketë një plan afatgjatë për zhvillim dhe urbanizim. Në vizionin e ri, Çairi do të zhvillohet si një komunë moderne, me nevojat e qytetarëve, lirinë e lëvizjes dhe sigurinë e qytetarëve në qendër të strategjisë.”
Sipas Osmanit, arkitekti Rojkind tashmë ka identifikuar pikat kyçe për përmirësim, duke përfshirë hapësirat publike, qasjen, estetikën dhe funksionalitetin.
“Çairi nuk duhet më të shihet si simbol i kaosit, mosfunksionimit dhe mosveprimit. Për mua Çairi është shtëpia ime, dhe si kryetar do të jap çdo atom energjie për ta ngritur nga hiri,” përfundoi Osmani. Flaka Media
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
