Mickoski: Filloi ndërtimi i interkonektorit gazsjellës me Greqinë 

Sot u shënua fillimi i ndërtimit të interkonektorit gazsjellës ndërmjet Maqedonisë së Veriut dhe Greqisë, një investim kapital në vlerë prej rreth 60 milionë eurosh, që synon të transformojë vendin në një qendër kyçe të infrastrukturës energjetike në rajon.

Në një fjalim para të pranishmëve – përfaqësues të institucioneve, investitorë dhe partnerë ndërkombëtarë – Kryeministri Hristijan Mickoski e cilësoi këtë projekt si “fillimin e një epoke të re për stabilitetin dhe pavarësinë energjetike të vendit”.

“Ky nuk është vetëm një investim në tuba dhe beton, por një kontribut drejt një të ardhmeje më të sigurt, me ekonomi më efikase dhe strategji më të qëndrueshme për të gjithë qytetarët”, u shpreh Mickoski.

Përmasat e projektit:

• Gjatësia e gazsjellësit në territorin maqedonas: 66.7 km
• Diametri i tubacioneve: 700 mm
• Kapaciteti fillestar: 1.5 miliardë m³ gaz/vit, me mundësi zgjerimi në 3 miliardë
• Vlera totale: 3.7 miliardë denarë (~60 milionë euro)

Projekti mbështetet nga Banka Evropiane e Investimeve, BERZH dhe Bashkimi Evropian, si dëshmi e besimit ndërkombëtar ndaj kapaciteteve zhvillimore të Maqedonisë së Veriut.

“Ky është një hap konkret për të ulur çmimet për qytetarët, për të garantuar furnizim të qëndrueshëm për industrinë dhe për të krijuar konkurrencë reale në tregun energjetik”, tha më tej Kryeministri.

Mickoski theksoi se interkonektori është vetëm një segment i mozaikut më të madh të zhvillimit – i cili përfshin investime në rrugë, shkolla, spitale dhe zona të reja industriale. Ai përfundoi duke e quajtur këtë projekt “themel i arkitekturës së re energjetike të vendit” dhe një mundësi e re për investitorët dhe të rinjtë. Flaka