Mickoski flet për ulje borxhi, por faktet mungojnë – opozita paralajmëron manipulim financiar

Kryeministri Hristijan Mickoski është përpjekur sot të përgënjeshtrojë akuzat e opozitës për borxhim të tepruar të shtetit, duke deklaruar se “në vend që të marrim borxhe, kemi ulje të borxhit publik me 4.7% të BPV-së”. Por deklaratat optimiste të kreut të Qeverisë vijnë në një moment kur raportet e pavarura dhe analizat ekonomike hedhin hije dyshimi mbi transparencën dhe përbërjen reale të borxhit shtetëror.

Sipas Mickoskit, Qeveria aktuale ka shlyer euroobligacionin prej 500 milionë euro të marrë në vitin 2018 dhe nuk ka rritur tatimet, TVSH-në apo moshën e pensionimit, përkundër presioneve nga organizatat ndërkombëtare. Madje, ai deklaron se investimet kapitale janë fokusi kryesor i huamarrjes aktuale dhe jo – siç u shpreh ai – “pagesa e pensioneve dhe pagave” si në kohën e Qeverisë paraprake.

“Gjithçka që kemi marrë hua, ka shkuar për investime. Dhe pavarësisht gjithçkaje, kemi arritur të rrisim pensionet dhe të mbajmë çmimin e energjisë të pandryshuar për qytetarët,” – tha Mickoski.

Por deklaratat e tij nuk shoqërohen me të dhëna konkrete mbi strukturën e borxhit, koston reale të shlyerjes së euroobligacioneve dhe burimet e likuiditetit në një klimë ekonomike të pasigurt. Akoma më pak sqarohen prioritetet e investimeve “kapitale” dhe përfitimet e drejtpërdrejta për qytetarët.

Mungesa e transparencës, si dhe pohimet e njëanshme për “rritje pensionesh” dhe “ulje deficiti”, sipas opozitës dhe analistëve të pavarur, mund të shërbejnë më shumë si retorikë politike sesa si pasqyrë reale e gjendjes ekonomike.

Opozita kërkon auditim të pavarur të borxhit publik dhe publikimin e të dhënave të detajuara për të kuptuar nëse vërtet ka pasur ulje, apo nëse thjesht është zhvendosur borxhi nga një kategori në tjetrën.

Në një klimë me sfida fiskale dhe sociale, qytetarët meritojnë më shumë se fjalë – kërkohet llogaridhënie, jo vetëm retorikë. Flaka