“Mirëmëngjes për të gjithë, përveç Josip Broz Kasamit”

Protesta e mbrëmshme në Tetovë, e organizuar pas vendimit për shfuqizimin e emërtimeve të rrugëve, kaloi pa incidente, ndërsa pas përfundimit të saj pasuan reagime të shumta nga përfaqësues politikë, analistë dhe aktivistë qytetarë. Protesta ishte paralajmëruar nga BDI si reagim ndaj vendimit të Gjykatës Kushtetuese për emërtimet e rrugëve në Tetovë.

Zyrtari i BDI-së, Arbër Ademi, publikoi një mesazh të shkurtër në rrjetet sociale:

“Mirëmëngjes për të gjithë, përveç Josip Broz Kasamit. Josip Broz Kasami nuk kalon!”

Me këtë deklaratë, Ademi vazhdoi retorikën e tij kritike ndaj kryetarit të Komunës së Tetovës, Bilall Kasami.

Ndërkohë, analisti Sefer Selimi e komentoi protestën me një mesazh simbolik:

“Shkëndijë në Tetovën e Dervish Carës!”

Edhe aktivistja qytetare Nafie Selmani reagoi pas protestës, duke rikthyer në vëmendje paralajmërimet e mëhershme të VLEN-it për rreziqe të mundshme gjatë tubimit.

“Ç’u bë me informacionet shqetësuese të VLEN-it për ‘persona të caktuar’, ‘incidente’, ‘skenare të errëta’? Tetovarët dhe tetovarët e dhanë përgjigjen më dinjitoze!”

Protesta u zhvillua pa incidente dhe në atmosferë të qetë, pavarësisht paralajmërimeve politike dhe polemikave që e paraprinë atë. Në ditët para protestës, përfaqësues të VLEN-it kishin ngritur shqetësime për mundësinë e provokimeve, ndërsa organizatorët kishin bërë thirrje për një marsh paqësor.

Reagimet e sotme tregojnë se debati politik rreth emërtimeve të rrugëve në Tetovë vazhdon të mbetet i ndezur, ndërsa secila palë po e interpreton zhvillimin e protestës sipas narrativës së saj politike. Gazeta Flaka